د پاکستان پولیس په پنجاب، خیبرپښتونخوا، لاهور، کراچۍ او نورو ښارونو کې د افغان کډوالو د جبري ایستلو لړۍ پیل کړې او افغانانو سره یې بد چلن ته مخه کړې.
په ټولنيزو رسنيو کې له خپرو شويو ويډيو ګانو څرګنديږي چې پاکستاني پولیس په ښارونو کې افغانان په زور او جبرسره موټرو ته اچوي.
دې ويډيوګانوږ د ټولنیزو رسنيو د فعالانو توند غبرګون راپارولی او د پاکستاني پولیسو دغه غير انساني چلن يې غندلی دی.
په پاکستان کې پر افغان کډوالو له فشارونو سره سم، هلته مېشت کډوال او کاروباریان اړ شوې چې خپلې شتمنۍ په ټیته بیه لیلام کړي.
افغان کډوال وایي، بازار سوړ او توکي څوک نه ترې اخلي او اړ دي چې په ډېره کمه بیه یې وپلوري.
په پاکستان کې مېشت افغان کډوال ملک مجاهد شینواری وايي: « په پنجاب آیالت کې افغان مهاجرین ځای پرځای نیول کېږي، د حاجي کمپ په نوم یوه مرکز ته لېږدول کېږي او له دې مرکز بیا افغانستان ته اړول کېږي. دا چې افغان مهاجرین دلته کاروبارونه لري او مجبور دي چې د خپل کاروبار لپاره ووځي. دوی دلته په لویه کچه کاروبار او دوکانونه لري، پیسې یې له خلکو سره بندې دي؛ نو له همدې امله دومره ژر او لږ وخت کې د افغان کډوالو وتل ناممکنه خبره ده.»
يو شمېر افغان پانګوال هم د کلونو راهیسې په خبیر پښتونخوا او نورو سيمو کې ميشت شوي او اوس په لنډه موده کې نه شي کولی چې پراخ شوی کاروبار یې راټول کړي.
دوی د پاکستان له حکومته غواړي چې د افغان کډوالو د جبري ایستلو لړۍ دې ودروي.
پاکستان کې مېشت افغان پانګوال عمران وايي: « د پاکستان له حکومت زموږ غوښتنه د ا ده چې لږترلږه دومره وخت ورکړي چې دوی خپل کاروبار راټول کړي او افغانستان کې د اوسېدو لپاره ځای جوړ کړي.»
د نړیوالو اړیکو کارپوهان بیا په دې باور دي چې پاکستان افغان کډوال د خپلو سیاسي موخو د تعقیب لپاره ځوروي.
دوی له سرپرست حکومته غواړي چې د افغان کډوالو روان وضعیت کابو کولو لپاره دې له ډېپلوماټيکو لارو اسلام اباد سره خبرې وکړي.
د نړیوالو اړیکو کارپوه نجیب الرحمن شمال وايي: « زه هیله لرم نړیوال سازمانونه او په ځانګړې توګه د ملګرو ملتونو د بشري حقونو اداره او د کډوالو په چارو کې ستره کمېشنري چوپ پاتې نه شي او پر پاکستان فشار راوړي چې پر افغان کډوالو له ظلم او زیاتي لاس واخلي. دغه راز شته ستونزې د نړیوالې ټولنې په همکارۍ له ډېپلوماټیکو لارو حل کړي.»
له پاکستانه د افغان کډوالو د جبري ایستلو د وروستۍ نیټې له پای ته رسېدو وروسته، د دې هېواد چارواکو په خیبرپښتونخوا کې د لنډمهاله کمپونو په جوړولو سره د ایستلو بهیر پیل کړ.
که څه هم سرپرست حکومت او نړيوالو سازمانونو په کراتو له اسلام اباد د افغان کډوالو د جبري ايستلو لړۍ د درېدوغوښتنه کړې، خو له دې سره هم پاکستان د افغان کډوالو لپاره ټاکلی ضرب الاجل اوږد نه کړ.
