له پاکستانه د افغانانو د را ایستلو دویمې څپي له امله تر اوسه هېواد ته اته زره کورنۍ را ستنې شوې دي.
په تورخم کې د عمري پنډ غالي د اطلاعاتو او عامه پوهاوي برخې د مسولانو په خبره، یادې کورنۍ چې۴۰ زره تنه کېږي، خپل هېواد ته پر راتګ خوښې دي خو د کاري فرصتونو، سرپناه او د اولادونو د ښوونې روزنې برخه کې له حکومته د همکارۍ غوښتنه کوي.
له پاکستانه راستنې شوې کورنۍ یو غړی وايي: « له حکومت غوښتنه کوو چې موږ دلته هېڅ ډول ځای او کور نه لرو، بله دا چې زموږ ماشومان په پاکستان کې په ښوونځیو کې وو، خو دلته له ښوونځیو او مدرسې پاتې دي. له حکومت غوښتنه کوو چې زموږ بچیانو ته د تعلیم غم وخوري، ترڅو بې تعلیمه پاتې نه شي.»
له پاکستانه یو بل راستون شوی کډوال وايي: « زه له حکومت غوښتنه کوم چې ماته لږ ځای راکړي، یوه خېمه هم وي قبوله ده. زه به زحمت وباسم، کار به وکړم خو چې سرپناه ولرم.»
په همدې حال کې حکومتي چارواکي راستنو شویو افغانانو ته د کاري زمینو، سرپناه او زده کړو په برخه کې د حکومت پر کاري لومړیتوب تینګار کوي.
د کار او ټولنیزو چارو وزارت د کار معین مولوي محمد ذاهد په دې اړه وايي: « د کار او ټولنیزو چارو وزارت په دې هڅه کې دی چې له پاکستان او نورو هېوادونو څخه زموږ راستنېدونکي مهاجر وروڼو ته یو سیسټم برابر کړي. همدارنګه هغو کسانو ته چې لوړې زده کړې لري، د کار زمینې برابرولو په برخه کې هڅه کوو.»
دا په داسې حال کې ده چې تېره اوونۍ د اسلامي امارت د ریاست الوزراء اداري مرستیال ننګرهار او کونړ ولایتونو ته د خپل سفر پرمهال هم ژمنه کړې وه چې راستنو شویو هېواد والو ته به په ټولو برخو د ژوند اسانتیاوې برابرې شي.
