د اسلامي امارت د بهرنیو چارو وزارت سرپرست مولوي امیرخان متقي د ملګرو ملتونو د نشه يي توکو او جرمونو دفتر له عملیاتي رییس سره کتلي دي.
د دغه و زارت مرستیال ویاند ضیا احمد تکل وايي، په دې کتنه کې د نشه يي توکو د کښت، تولید او قاچاق د مخنیوي او پر نشه يي توکو د روږدو کسانو د درملنې په اړه د حکومتي اقدماتو په اړه خبرې وشوې.
د تکل په خبره، کتنه کې امیرخان متقي له نړیوالو وغوښتل چې افغان کروندګرو سره د بدیل معیشت، د عایدو قانوني سرچینو برابرولو او د مالدارۍ، کرنې او کوچنیو تولیدي فعالیتونو د رامنځته کولو په برخه کې همکاري وکړي.
تکل په دې اړه وايي: « د هېواد بهرنیو چارو وزیر د مخدره توکو پر وړاندې د افغانستان اسلامي امارت مبارزه تاریخي وبلله او زیاته یې کړه چې د هېواد ټول ارګانونه او امنیتي ځواکونه په جدي ډول له دغې پدیدې سره د مبارزې هوډ لري او اجازه نه ورکوي چي یو ځل بیا له دغې پدېدې زموږ ټولنه او سیمه متضرره شي. دغه راز د بهرنیو چار وزیر پر نړیوالو ږغ وکړ چې افغان کروند ګرو ته د بدیل معیشت، د عایداتو قانوني سرچینې برابرولو او د مالدارۍ، کرنې او کوچنیو تولیدي فعالیتونو د رامنځته کولو په برخه کې همکاري ترسره کړي.»
تکل زیاته کړې، په دې کتنه کې دغه راز دواړو لوریو ټینګار کړی چې د نشه يي توکو پر وړاندې مبارزه باید غیر سیاسي وي، د بشري همکاریو روحیه دایمي وساتل شي او په دې اړه ناستې عملي پایلې ولري.
