د کار او ټولنیزو چارو وزارت چارواکي وايي، د کابل څرخي پله د فني او حرفوي زده کړو له مرکزه څه باندې ۵۰۰ د نشه يي توکو له کارولو رغېدلي کسان فارغ شوې دي.
د دې وزارت چارواکي وایي، ياد کسان به یوځل بیا ټولنې ته د روغو انسانانو په څېر ور وګرځي او خپلو کورنيو ته به د زده کړې کار له لارې ډوډۍ پیدا کوي.
د کار او ټولنیزو چارو وزارت معین مولوي زاهد احمدزی وايي:« دوی به یو وار بیا د عادي او روغو انسانانو په توګه له خپلو کورنیو او ټولنې سره مدغم شي او له دې وروسته به د خپلې کورنۍ لپاره د حلالې نفقې برابرولو مسوولیت هم واخلي.»
د کار او ټولنیزو چارو وزارت مسوولین دغه راز له خلکو غواړي چې له اعتیاد او د نشه يي توکو کارونې رغېدلو کسانو سره داسې نرم چلن وکړي چې بیا ځل د نشه یي توکو کارولو ته مخه نه کړي.
د کار او ټولنیزو چارو وزارت ویاند سمیعالله ابراهیمي وايي: « تر ډېره د کار په بازار کې د دوی تعقیب او څار ترسره کېږي، ترڅو کار وکړي او بیا مخدره توکو ته مخه نه کړي. همدارنګه د دوی له کورنیو تضمینات اخیستل کېږي چې د دوی ژوند ته به پاملرنه کوي، ستونزې به یې هواروي. دا کارونه د دې لپاره کېږي چې دغه کسان بیا ځل نشه يي توکو ته مخه نه کړي.»
بل پلو، یو شمېر هغه کسان چې تازه له اعتیاده رغېدلي وایي، سرپرست حکومت دې یې لاسنیوي ته ادامه ورکړي او د کاري فرصتونو په برابرولو سره دې بیا ځل د نشه يي توکو کارولو ته د دوی له ورګرځېدو مخنیوی وکړي.
د نشه يي توکو له کارولو رغېدلی حسیب الله عزیزي وايي: « له اسلامي امارت غوښتنه کوو چې دغه کسان له روزنیز مرکز د باندې هم حمایت کړي او د کار زمینه ورته برابره کړي؛ دا ځکه چې دغه کسان اړتیا لري او دومره بودیجه نه لري چې ځان ته کار او دوکان برابر کړي. که ملاتړ یې وکړي، دا به ډېر ښه شي.»
د نشه يي توکو له کارولو یو بل رغېدلی محمد اسلام وايي: « له موږ سره یې چې کومې وعدې کړې، هغه دې پوره کړي. بله دا غوښتنه لرو چې د پخوانۍ ملي اردو یو شمېر سربازان له ښو مسلکونو برخمن وو، انجینران وو او د مختلفو وسلو د کارولو مهارت یې درلود، هغوی ته باید دندې ورکړي.»
د کار او ټولنیزو چارو وزارت چارواکو همداراز پر نړیوالو هم غږ وکړ چې د اسلامي امارت لاسنیوی وکړي او د افغانستان د کرنې او نورو سکتورونو له ودې سره مرسته او همکاري وکړي.
