ننګرهار کې د یوه خصوصي پوهنتون د فراغت په مراسمو کې له لوړو زدهکړو تازه فارغ شوي ځوانان وايي، ورځ تربلې يې شمېر زیاتېږي، خو برعکس کاري فرصتونه خورا کم دي او دا سبب شوي چې دوی او نور ځوانان د لوړو زده کړو انګېزه له لاسه ورکړي.
دوی زياتوي، په ورستیو کې د بشري او ټولنیزو علومو اړوند پوهنځيو له لوستلو سره د ځوانانو علاقه کمه شوې او لامل يې دا دی چې له فارغېدو وروسته ورته په يادو څانګو کې کار نه پيدا کېږي.
د لیسانس دورې فارغ التحصیل رازي ګل وايي: « حقوق، ادبیات، ژورنالېزم او ځینې نور هغه پوهنځي دي چې مینه وال او زده کوونکي یې ورځ تر بلې کمېږي. داسې پوهنتونونه هم شته چې دا پوهنځي یې لغو کړي دي.»
له پوهنتون تازه فارغ شوی خالقیار وايي: « د ابیاتو، حقوقو او اقتصاد پوهنځي د سقوط په حال کې دي. له دولت غوښتنه کوو چې دغو څانګو ته پاملرنه زیاته کړي، ترڅو ترې فارغو کسانو ته د کار زمینه برابره شي.»
تازه فارغ شوی محصل عبد الباسط وايي: « له پوهنتونونو څخه د فارغېدونکو ځوانانو شمېر ورځ تر بلې په زیاتېدو دی، خو کار نه شته. هیله ده دغو کسانو ته کاري فرصتونه برابر شي.»
په همدې حال کې ځینې پوهنتونونه هم مني چې اوسمهال بشري علومو کې د محصلینو جذب انداره نهایت کمه شوې او که دا حالت دوام وکړي، نو د مسوولانو په خبره يې، ښايي یادې څانګې په بشپړ ډول وتړل شي.
د خصوصي پوهنتون رییس طارق کمال وايي: « له بده مرغه د بشري علومو په ټولو پوهنځیو او په ځانګړې توګه د ژورنالېزم په پوهنځي کې د محصلینو شمېر ډېر کم شوی او ورځ تر بلې لا پسې کمېږي.»
ځايي مسوولان بیا وايي، حکومت په ټولو برخو کې ځوانو کادرونو ته اړتیا لري او هڅه یې دا ده چې کاري فرصتونه ورته ایجاد کړي.
دوی زیاتوي، لوړو زدهکړو ته د ځوانانو هڅولو په موخه له خصوصي پوهنتونو سره د فیسونو کمولو په اړه هم تفاهم ته رسېدلي او ورسره به لوړو زدهکړو ته د ځوانانو لاسرسی زيات شي.
د ننګرهار والي سلاکار سمېعالله سمون وايي: « انشاالله دوی ته به د نظام په داخل کې کاري فرصتونه هم برابر شي، په دې اړه خبرې او کار روان دی. همدارنګه، د فیسونو په تړاو به د ماسټرۍ او دوکتورا په کچه د لوړو زده کړو لپاره هم په دولتي او خصوصي پوهنتونونو کې لازمې اسانتیاوې برابرې شي.»
لوستي ځوانان داسې مهال د کاري فرصتونو غوښتنه کوي چې ورځ تر بلې په هېواد کې له پوهنتونونو د فارغېدونکو کسانو شمېر زیاتېږي، خو د کاري فرصتونو کموالي له امله ډېری هغه یې حتا په ناقانونه توګه کډوالۍ ته هم اړ کېږي.
