ګوترس زیاته کړې:«له هرو درېیو ښځو یوه یې له مستقیم تاوتریخوالي سره مخ ده. ملګري ملتونه له حکومتونو سره په دې تړاو کار کوي،چې د ښځو او نجونو د خوندیتوب لپاره خپل قوانین او قواعد پیاوړي کړي. موږ باید نور د جندر تاوتریخوالي ته د پای ټکی کیږدو.»
اخوا د قطر د بهرنیو چارو وزیر محمد بن عبدالرحمن الثاني هم په یوه ځانګړې مرکه کې ویلي، د طالبانو وروستیو پرېکړو حیران کړی او اوغوښتنه یې وکړه،چې خپلو وعدو ته ژمن پاتې شي.
الثاني زیاتوي:« له طالبانو زموږ همیشنۍ غوښتنه همدا ده او وه،چې هغوی باید پر خپلو ژمنو عمل وکړي. په دغو ژمنو کې یوه ژمنه دا وه،چې ښځو ته د کار او نجونو ته د زدکړو حق ورکړي. نړیوالې ټولنې هم همدا غوښتل،خو هغه څه چې دوه ورځې وړاندې اعلان شول، زموږ لپاره ډېر له شوک ډک او حیرانوونکي ول. موږ پرې اندیښمن یو.»
د افغانستان لپاره د امریکا ځانګړي استازي ټوماس وېسټ په دوحه فورم کې د خبرو پر مهال هم د نجونو پر زده کړو ټینګار وکړ او زیاته یې کړه،چې د پوهنې برخه د نړیوالو لپاره ډېره اړینه ده او باید ډېره پاملرنه ورته وشي.
وېسټ زیاته کړې:« په وروستي ځل چې په اکټوبر کې موږ له طالبانو سره ناسته درلوده، هغوی له موږ دا غوښتنه وکړه،چې زموږ ملکي ادارې بېرته فعالې کړئ، نو موږ فکر وکړ چې پیل یې له کوم ځای وکړو. نو موږ او نړیوالو ته اړین سکټور د پوهنې برخه وه. بیا موږ هم له طالبانو غوښتنه درلوده،چې نجونو ته په هره کچه د زده کړو فرصت برابر کړي. ځکه دا د هغوی بشري حق دی.»
وېسټ تر دې وړاندې بیا دا هېله څرګنده کړې وه،چې طالبان به راتلونکو څو ورځو کې له خپلې پریکړې تېر شي او نجونو ته به له شپږم ټولګي پورته د زده کړو اجازه ورکړي.
