له څه باندې دوه کلن ځنډ وروسته کابل ته د فلای دوبۍ په نوم د متحده عرب اماراتوهوايي شرکت الوتنې بېرته پیل شوې او د چهارشنبې پر ورځ د ( ۱۴۰۲ کال د لړم پر ۲۴ مه) یې لومړۍ الوتنه کابل ته وکړه.
د ترانسپورت او هوايي چلن وزارت مسوولینو په دې اړه جوړو شویو مراسمو کې وویل، نږدې ورځو کې به نور نړیوال شرکتونه هم افغانستان ته خپلې الوتنې پيل کړي.
د ترانسپورټ او هوايي چلن وزارت د هوايي میدانونو عمومي مسوول عبدالستارغروال وايي:« د افغانستان ټول هوايي ډګرونه زموږ خپل داخلي تخینکي پرسونل لري او ټول خدمات وړاندې کوي. نن ورځ په دې الوتکه کې شااوخوا ۱۴۵ هغه مسافر وروڼه له دوبۍ راغلل او دوی به بېرته هم همدومره مسافر وړي. »
له دې وړاندې کام ایر او اریانا افغان هوايي شرکتونو دوبۍ ته الوتنې لرلې چې یوشمېر هېوادوالو یې له لوړو بیو سرټکاوه.
خو اوس مسافر وايي، د فلای دوبۍ الوتنو پیل سره به په بیو کې کموالی راشي او تمه ښايي چې نور نړیوال شرکتونه به هم افغانستان ته الوتنې پيل کړي.
له عربي اماراتو یو تن راستون شوی مسافر وايي:«دا ډېره د خوښۍ خبره ده چې له دوه کلن ځنډ وروسته فلای دوبۍ هوايي شرکت افغانستان ته خپلې الوتنې پيل کړې. دا د مسافرو لپاره ډېر ښه زیری دی.»
ورته مهال د کابل هوايي ډګر مسوول عبدالهادي محمدي وايي، د دې هوايي ډګر خدمات یې له ۱۶ ساعتونو ۲۴ساعتونو ته غځولي او هڅه کوي چې اړتیا وړ په نړیوال سټنډرډ اسانتیاوې برابرې کړي.
هغه زیاته کړه:« زموږ هوايي ډګر وړاندې ۱۶ ساعته خدمات وړاندې کول خو له دې وروسته به ۲۴ ساعته خدمات وړاندې کوي.»
په متحده عرب اماراتو کې د میشتو افغانانو شورا مشر عبیدالله صدرخېل بیا وايي، تېرو دوه کلونو کې یو شمېر هوايي شرکتونو له فرصته استفاده کړې او په لوړه بیه یې ټکټونه پلورل خو د نړیوالو شرکتونو الوتنو سره به دا ستونزه تر ډېره حل شي.
صدرخېل زیاتوي:« د فلای دوبۍ هوايي شرکت الوتنو پیل سره به مو هېوادوالو ته که د هېواد دننه دي او که بهر چې سفر کوي د ټکټونو بیو کې کموالی راشي. انشاء الله د دې ګټه به زموږ او تاسو بزګرانو ته رسېږي. سر له نن به فلای دوبۍ هوايي شرکت د ورځې دوه الوتنې کوي او د همدې میاشتې له ۲۲ مې نېټې وروسته به د ورځې درې الوتنې کوي او راتلوونکې میاشتې کې به د ورځې ۴ الوتنې کوي.»
د مسوولینو په خبره چې فلای دوبۍ هوايي شرکت به اوس د ورځې دوه خو د راتلونکۍ اونۍ وروسته به څلور الوتنې ترسره کوي.
د دې ترڅنګ دوی ډاډ ورکوي چې نږدې راتلونکي کې به درې نور نړیوال هوايي شرکتونه افغانستان ته خپلې الوتنې پیل کړي چې د ټکټونو په بیو کې به ورسره د پام وړ کموالی راشي.
