له جلال اباد وروسته اوس د لغمان ولایت په مرکز مهترلام بابا ښار کې هم د ټرافیکي بې نظمیو او ګڼه ګوڼې د کنټرول لپاره په ښار کې د رېکشو پر تګ راتګ بندیز ولګول شو.
د لغمان ولایتي ادارې چارواکي وایي، د رېکشو پر تګ راتګ لګول شوی بندیز عملي شوی او موخه یې دا ده چې ښاري نظم ټینګ او د خلکو تګ راتګ خوندي شي.
د لغمان والي ویاند عبد المالک نیازی وايي: « د دې پرېکړه موخه دا نه ده چې د رېکشا چلوونکو د کار مخه ونیسو او دوی ته زیان ورسوي بلکې دغه ګام د ښاري نظم لپاره پورته شوی، ترڅو خلکو ته اسانتیاوې برابرې شي او وکولی شي په ټاکلي وخت خپلو کارونو او کورونو ته ورسېږي.»
لغمان چارواکي د ښاري نظم د بیا تنظیم لپاره د رېکشو پر تګ راتګ دا بندیز داسې مهال لګوي چې تر دې مخکې دا تجربه د ننګرهار ولایت مرکز جلال اباد ښار کې د لومړي ځل لپاره و ازمویل شوه.
که څه هم د جلال اباد ښار اوسېدونکي د ښار په مرکزي سیمو کې د رېکشو پر تګ راتګ له بندیز وروسته، له ځینو نویو ستونزو سره مخامخ شوي او د ټرانسپورټي وسایطو له کمښت شکایت کوي.
د مهترلام ښار اوسېدونکي او رېکشا چلوونکي بیا دا بندیز د ستونزې بنسټیز حل نه بولي او وايي، په ښار کې د ګڼه ګونې اصلي لامل د نفوسو زیاتوالی دی او دا ستونزه یوازې د ښاري سیمو په پراخولو سره حل کېدای شي.
رېکشا چلوونکی مطیع الله وايي: « زموږ غوښتنه دا ده چې دا ښار او بازار لږ غټ کړي، لارې او سړکونه یې جوړ کړي او کوڅې پخې کړي. له ګاونډیو هېوادونو ډېر مهاجر راغلي او ورسره په ښار کې انسانان، موټر او رېکشاګانې ډېرې شوې دي.»
د مهترلام اوسېدونکی پښتونیار وايي: « نه پر سړک لار شته او نه په پیاده رو کې. له حکومت غوښتنه کوو چې ښار پراخ کړي، ترڅو هرچا ته لاره پیدا شي. همدارنګه باید د رېکشا په ځای د بدیلو ټرانسپورټي وسایطو غم هم وخوړل شي.»
د مهترلام ښاروالۍ چارواکي بیا وايي، د ښاري سیمو پراخولو په تړاو یې هم ځینې ګامونه پورته کړي او له ښاره یې د ځینو کاروباریانو ایستلو او په مناسبو ځایونو کې د ځای پر ځای کولو پرېکړه کړې.
دوی هیله څرګندوي چې له دې سره به په ښار کې موجوده ګڼه ګوڼه کنټرول او ښاري سیمې هم ورسره پراخې شي.
مهترلام ښاروال رحمت الله شهامت وايي: « په دې ښار کې تر ۷ زرو رېکشا ګانې شته او دا ډېرې دي. موږ د ښار د پراختیا لپاره موټر پلورنځي له ښاره و ایستل، همدارنګه د نجارانو لپاره هم له ښار څخه د باندې ترتیب برابروو. د فلزکارانو او مستریانو لپاره هم له ښار څخه بهر د بل ځای پر برابرولو کار کوو او غواړو ښار ته هم پراختیا ورکړو.»
دا چې د ښار په مرکزي سیمو کې د رېکشاګانو پر تګ راتګ د بندیز لګول به په مهترلام ښار کې موجوده بې نظمي او ګڼه ګوڼه کنټرو ل کړي او که نه، دا لا څرګنده نه ده؛ خو په ښار کې دننه د خلکو د تګ راتګ په برخه کې به ځینې نورې ستونزې را ولاړې او یو شمېر کسان به بې روزګاره کړي.
