د پښتون ژغورنې غورځنګ غړیو د جرمني په برلین کې د سولهییز لاریون پرمهال د جرمني له حکومت وغوښتل چې د افغان کډوالو ایستلو پر پرېکړې له سره غور وکړي.
د پښتون ژغورنې غورځنګ غړي وایي، دوی به خپلو مبارزو او لاریونونو ته تر هغې ادامه ورکړي چې د جرمني حکومت یې غوښتنې منلې نه وي.
په جرمني کې د پښتون ژغورنې غورځنګ له دې هېواده د افغانانو د جبري ستنولو په اړه اندېښنه څرګنده کړې او د دې لړۍ د سملاسي درولو غوښتنه یې کړې.
لاریون کوونکی اسدالله وايي: « زموږ دا راټولېدنې به ادامه ولري، ترڅو د افغانانو حقوق رعایت شي او د ډیپورټ کېدو لړۍ یې بنده شي.»
لاریون کوونکی احمدزی وايي: « زه داسې کسان پېژنم چې د میاشتې ۳۶۰ ساعته کار کوي، خو اوس له دې ځایه لېږل کېږي او هېڅوک غږ نه پورته کوي. له دومره کار سره هم د مجرم په نوم بېرته افغانستان ته استول کېږي، دا زموږ له خلکو سره ظلم دی.»
لاریونوالو د افغان کډوالو د وضعیت په اړه اندېښنه څرګنده کړې او ټینګار یې کړی چې د هغوی د پناه غوښتنې او استوګنې قضیې باید د بشري حقونو او قانوني اصولو په پام کې نیولو سره و ارزول شي.
د پښتون ژغورنې غورځنګ په یوې اعلامیه کې هم ویلي چې اندېښنه دا ده هغه کسان چې په جبري توګه ستنول کېږي، داسې کسان هم پهکې شته چې هېڅ ډول جرمي سابقه نه لري مګر بیا هم داسې هېواد ته ستنول کېږي چې لاهم له جدي بشري ستونزو سره مخ دی.
د کډوالو د حقونو فعالان هم له جرمني غواړي چې له افغان کډوالو سره د نړیوالو قوانینو او اصولو له مخې چلن وکړي.
د کډوالو حقونو فعال ګلاخان بهادري وايي: « د پښتون ژغورنې غورځنګ د لاریون کوونکو غوښتنې د جدي پاملرنې وړ دي. زموږ غوښتنه هم دا ده چې له افغان کډوالو سره باید د قانون، انساني کرامت او عادلانه چلن پر بنسټ برخورد وشي.»
د کډوالو حقونو فعال عبدالرازق عدیل وايي: « جرمني نه باید افغانان له کوم دلیل پرته، یوازې د افغان توب له امله اخراج کړي. هره دوسیه باید جلا او د واقعي خطر، د فرد د مخینې، کورني او حقوقي وضعیت له مخې وڅېړل شي.»
د پښتون ژغورنې غورځنګ د جرمني څانګې همدارنګه له دې هېواد غوښتي چې د ستنولو پر ځای د هغو کسانو خوندیتوب او انساني کرامت ته لومړیتوب ورکړي چې افغانستان ته د بېرته ستنېدو په صورت کې له ستونزو سره مخ کېدای شي.
دا لاریون داسې مهال کېږي چې په جرمني او د اروپا په یو شمېر نورو هېوادونو کې د کډوالۍ پر سیاستونو بحثونه زیات شوي او د افغان کډوالو د استوګنې او بېرته ستنولو موضوع هم د دغو بحثونو یوه برخه ده.
