له بایډن د استازو جرګې یو شمېر غړو غوښتنه؛ د افغانستان کنګل شوې شتمني ازاده کړه 

د امریکا  متحده ایالتونو د استازو جرګې دوو دیموکراتو غړو جیسن کرو او ټام مالینوسکي او د همدې جرګې  جمهوري غوښتونکي غړي پیټر مایجر له ولسمشر جو بایډن غوښتي،چې د اقتصادي ستونزو د حل او بشري ناورین د مخنیوي لپاره دې د افغانستان کنګل شوې شتمني ازاده کړي.

دغو امریکايي سناتورانود یوه لیک په خپرولو سره غوښتنه کړې،د کنګل شویو پیسو یوه د پام وړ برخه آزاده کړي،ترڅو د افغانانو ستونزې چې د اقتصادي‌ ستونزو له امله رامنځ ته شوي، یو څه کم شي. 

د امریکا د استازو جرګې دغو درېیو غړو په خپل لیک زیاته کړې:«موږ نه شو کولی اجازه ورکړو،چې افغانستان یو ځل بیا د ترهګرو سازمانونو په خوندي پټن ځای بدل شي،کوم چې د امریکایانو د وژلو او زموږ پر هېواد د برید پلان لري.»

تر دې وړاندې د برني سندرز په ګډون ګڼو نورو امریکایي استازو هم د افغانانو د کنګل شوې شتمني د ازادولو غوښتنه کړې وه.