له ایرانه د زرګونه راستنېدونکو کډوالو یوه بله جوپه هم تازه کابل ته را ورسېده. راستون شوی فرهاد په اوښلنو سترګو او غریو نیولي انداز له ایرانه د خپل راتګ کیسه کوي.
دی وایي، ایراني پوليسو ترې د ۲۵۰میلیونو تومانو په ارزښت کور په زور ضبط کړی او خالي لاسونه یې افغانستان ته را استولی دی.
له ايران راستون شوی فرهاد وايي: « ۲۵۰ میلیونه تومانه مې کور نیولی و، یو تومان یې هم رانه کړ؛ حتا د موټر کرایه یې هم رانه کړه چې تر دې ځایه ځان را ورسوم. ډېر بد چلن یې کاوه، زموږ کوچني ماشومان یې وهل.»
یو شمېر نور راستانه شوي بیا وایي، ایراني پوليسو د قانوني اسنادو لرونکي افغانان هم په زور نیول، خپل هېواد ته یې راستنول او د دې ترڅنګ یې خپلو ټولو اتباعو ته امر کړی چې افغان کارګرانو ته د مزدورۍ پيسې ور نه کړي.
له ايرانه راستون شوی احمد جان وايي: « پاسپورټ او اسنادو هېڅ ارزښت نه درلود، دا یې نه کتل بلکې تا ته یې کتل. د کوم ځای یې، د افغانستان، بس درځه.»
له ایران راستون شوی جاوید هاشمي وايي: « ما ته یې د ګرو نیولي کور پیسې رانه کړې، کله مې چې پیسې غوښتې نن سبا یې کول، ترڅو چې زه مجبور شوم او را ووتلم.»
په همدې حال کې د اقتصاد وزارت مسوولین چې له يادو راستنېدونکو سره د مرستې لپاره د مرستنديانو ترمنځ همغږي پر غاړه لري وايي، د راستنېدونکو لپاره د اسانتیاوو برابرولو، تر خپلو اصلي مېنو یې د رسولو او د دوی بنسټیزو اړتیاوو د پوره کولو په برخه کې له کورنیو او نړیوالو مرستندویه ادارو سره عملا کار کوي.
د اقتصاد وزارت ویاند عبدالرحمان حبیب وايي: « د اقتصاد وزارت ټولې اړین سهولتونه کورنیو او بهرنیو مرستندویه ادارو ته برابر کړي دي. په دې وخت کې راستنېدونکو مهاجرینو ته د خدمتونو وړاندې کول زموږ په کاري لومړیتوبونو کې ځای لري.»
له ایرانه راستانه شوې کډوال په داسې حال کې د خپل ناوړه وضعیت له امله شکایت کوي چې د ایران له لوري د افغان کډوالو جبري ایستلو لړۍ د ملګرو ملتونو، سره صلیب او یو شمېر نورو خپلواکو بنسټونو غبرګونونه له ځان سره لرلي دي.
