له اختر وروسته افغان جاپان روغتون کې د کرونا ناروغانو بسترونه زیات شوي او د ټیسټ لپاره د مراجعینو شمېر هم مخ په لوړ روان دی.
سره له دې چې عامې روغتیا وزارت په مکرر ډول د روغتیايي سپارښتنو پر عملي کولو ټینګار کوي خو د اختر په ورځو کې ګڼې ګوڼې او د خلکو تګ راتګ د دې لامل شوی چې په افغان جاپان روغتون کې بسترونه په کرونا وبا په اخته ناروغانو ډک شي.
روغتیا پالان وايي، له اختر وروسته په افغان جاپان روغتون کې د مریضانو د زیاتېدو تر څنګ د مراجعینو شمېر هم په بې ساري ډول زیات شوی دی.
عامې روغتیا وزارت په تېرو ۲۴ساعتونو کې د کرونا ویروس د دوه سوه یو ویشت مثبتو پېښو خبر ورکوي او زیاتوي چې په همدې موده کې شپږ کسان له دې ناروغۍ مړه شوي هم دي. عامې روغتیا وزارت د ماسک کارول یوازینی هغه لار یادوي چې د دریمې مرګونې څپې له بحراني کېدو مخنیوی کوالی شي.
عامې ورغتیا وزارت د واکسینو پر تطبیق ټینګار کوي او وايي، تر دې دمه د کرونا ضد واکسین ته د مراجعینو شمېر کم دی.
د روغتیا وزارت د مالومات ښيي چې تر دې دمه پنځه لکه شل زره ډوزه واکسین تطبیق شوي دي.
