د لغمان ولایت مرکز مهترلام اړوند زیارت کلي کې د سیند پر سر د یوه پل جوړېدو چارې پيل شوې. چارواکي وايي، د دې پل پر جوړولو ۵۲ میلیونه افغانۍ لګښت راځي.
د مسوولینو په خبره، د پل جوړېدو لګښت د حکومت له بودیجې ورکول کېږي او ټاکل شوې چارې یې د یوه کال په موده کې بشپړې شي.
د لغمان ټولګټو رییس ملا همایون وايي: « دا پل ۱۰۰ متره اوږدوالی او ۹ متره سور لري. دا پل په ۵۲ میلیونه افغانیو جوړېږي او په ۱۲ میاشتو کې به ګټه اخیستنې ته وسپارل شي. دغه پیسې د افغانستان اسلامي امارت له داخلي بودیجې څخه ورکول کېږي.»
چارواکي ډاډ ورکوي چې په دې ولایت کې به رغنیزې پروژې زیاتې او ستونزو ته ته د حل موندلو هڅې ګړندۍ شي.
د لغمان والي قاري بختیار معاذ وايي: « د لغمان ټوله اداره د خلکو په خدمت کې ده. موږ له شرکت لرونکو هم غوښتنه کوو چې د پل کیفیت ته پاملرنه وکړي او له معیارونو سره سم یې جوړ کړي.»
د سیمې خلک او موټر چلوونکي د د دې پل پر جوړېدو خوښ دي او وايي، په دې ځای کې د پل نه شتوالي له ګڼو ستونزو سره مخ کړي دي.
د لغمان اوسېدونکی اصحاب الدین وايي: « د دې پله له جوړېدو سره به د ډېرو خلکو ستونزې حل شي.»
د لغمان یو تن موټر چلوونکی رحمت الله وايي: « دلته د پله نه شتون له امله موږ اوږده لاره وهو، ترڅو له یوې خوا بلې خوا ته تېر شو. که دا پل جوړ شي، زموږ مزل او ستونزې به لنډې شي.»
لغمان کې د ټرافیکي ګڼه ګوڼې د مخنیوي او خلکو ته د اسانتیاوو برابرولو په موخه، ،دغه پل داسې مهال جوړیږي چې ورځ تر بلې په دې ولایت کې د نقلیه وسایطو په شمېر کې زیاتوالی راځي او د ټرافیکي ګڼه ګوڼې له امله خلک خپلو ورځنیو چارو ته پر وخت رسېدنه نه شي کولی.
