د لغمان کډوالو چارو اداره وايي، له تېرو نږدې درې اونیو راهیسې دې ولایت کې د جګړو زیاتوالي، د ګڼو پوستو او دولت شاه ولسوالۍ تر سقوط وروسته نږدې ۲ زره کورنۍ بې ځایه شوي دي.
یاده اداره وایي،د تازه بې ځایو شویو ډېری کورنۍ د مرکز مهترلام اړوندو سېمو کې ځای پر ځای شوي او خورا ناوړه حالت کې دي.
بې ځایه شوي وايي، د مرستو ژمنې ورسره شوي، خو تر اوسه پورې ورته رسېدلي نه دي.
بې ځایه شوی:« نن مو په دې پنډغالي کې څلورمه ورځ ده،د څښاک اوبه،خوراکي توکي او سرپنا نه لرو. یوازې ژمنې راسره شوي، خو تر اوسه پورې راسره مرسته نه ده شوې.»
خو د لغمان کډوالو اداره بیا وايي، د یادو کورنیو له ډلې یې تراوسه پورې شااوخوا ۳۰۰ کورنیو سره مرسته کړې ده.
د لغمان کډوالو چارو ادارې مشر انجنیر شاکر الله شاکر وایي:« دلته له ۱۶۰۰ تر ۲۰۰۰ پورې کورنۍ راغلي دي. په دې کې شااوخوا ۸۰۰ کورنۍ د الینګار،۴۰۰ کورنۍ د الیشنګ، ۲۰۰ کورنۍ د مرکز او شااوخوا ۱۵۰ کورنۍ د دولت شاه ولسوالۍ دي.»
ولایتي اداره وایي، د بې ځایه شوو ستونزې يي په مرکز کې له اړوندو مسولینوسره شریکې کړي،چې ورته بیړنۍ مرستې ترلاسه کړي.
والي رحمت الله یارمل وویل، ډېر ژر به بې ځایه شویو کورنیو ته زمینه برابره کړي،چې بېرته خپلو سیمو ته ستنې شي.
یارمل وایي:« مرکز مهترلام ته چې کوم بې ځایه شوي کسان له الینګار او الیشنګ راغلي، ملکي ادارې تر خپل وسه ورته رسېدنه کړې. همدارنګه له مرکزي مسوولینو سره مو د دوی انېښنې شریکې کړي او ډاډ یې راکړی،چې ژر به رسېدنه ورته وشي.
بې ځایه شویو کورنیو ته هم ډاډ ورکوم، چې راتلونکو څو ورځو کې به حالت عادي شي او کورنۍ به بېرته خپلو سیمو ته ستنې شي.»
چارواکي وايي، د مرکز مهترلام په ګډون يي په تېرو ۲۴ساعتونو کې په بېلابېلو سمیو کې د هوايي، توپچي او ځمکنیو بریدونو پایله کې ۳۸ طالبان وژل شوي او دغه راز ګڼې سیمې له وسله والو نیول شوي هم دي.
خو طالبانو بیا رسینو ته په رستول شوې خبر پاڼه کې ویلي، ټولې هغه سیمې اوس هم له دوی سره دي،چې د جګړې پرمهال یې نیولی دي.
