د بشر حقونو سازمان مشر: د بشرحقونو کمیسیون هېڅ لاسته راوړنه نه لري.
د بشر حقونو کمېسیون د ملي ګټو پر ځای شخصي ګټو ته ترجیح ورکوي او په ملي کچه هېڅ لاسته راوړنه، نه لري.
د دغه کمېسیون پر مشرې د تعصب، کرکې او افغان ضد مفکورې نیوکه ده.
د بشر حقونو سازمان وایي، د بشر حقونو کمېسیون د یو ځانګړي قوم، ژبې او ځانګړي فکر لپاره کار کوي او ملي ګټې یې هیرې کړي دي.
د بشر حقونو پر کمېسیون نیوکې دي چې قومي او ژبنی تعصب کوي او د بشري حقونو د خوندیتوب پر ځای د بشر حقونه تر پښو لاندې کوي.
د بشر حقونو سازمان مشر لعل ګل لعل پر دغه کمېسیون نیوکه کوي چې له بهرنیو هېوادونو پروژې اخلي او د هغوی فرمایشونه مخ ته وړي، خو ملي ګټې ترې هیرې دي.
لعل وایي، بشر حقونو کمېسیون د ملي نهاد په توګه کار نه کوي او د کرکې او افغان ضد مفکورې خپروي.
لعل ګل وایي، د بشر حقون کمېسیون د یو ځانګړي قوم په ولکه کې دی او په تېرو ۱۷ کلونو کې په ملي کچه هېڅ لاسته راوړنه نه لري او نه هم له هغو سازمانونو سره اړیکې جوړوي چې په ورته برخه کې هڅې کوي.
بشر حقونو کمېسیون صلاحیتونه او امکانات په لوړه کچه دي او کولی شي لویې لاستې راوړنې ولري، خو اصلي مسوولیت یې هیر کړی.
ومو غوښتل په دې اړه د بشر حقونو کمېسیون نظر هم ولرو، خو له پرلپسې هڅو سره سره هغوی زمونږ ټیلفون ته ځواب ورنه کړ.
تر دې وړاندې هم د بشر حقونو پر کمېسیون نیوکې وې چې پټه خوله یې ساتلې او یوازې د هغه څه په اړه غږ پورته کوي چې بهرني هېوادونه یې ورته ووایي.
