ولسي پاڅون کوونکو لعلپورې ولسوالي له طالبانو پاکه کړه.
دننګرهارپه لعلپورې ولسوالۍ کې له طالبانو نیول شوې سیمې بیا دطالبانو لاس ته نه ځي.
ختیځ کې دپوځ مسؤلین وایي، لعلپوره ولسوالۍ یې له طالبانو پاکه کړې او ددایمي امنیت په موخه یې ولسي پاڅون کوونکي ځای پرځای کړي.
ځایي خلک وایي، دطالبانو ظلمونو اړکړل، چې پرضد یې وسله پورته کړي.
د لعلپورې ولسوالۍ ګڼې سیمې چې اوس د افغان حکومت تر حاکمیت لاندې دي کلونه له وسله والو طالبانو سره وې.
پردې سربېره څېرمه ولسوالیو او د مرکزجلال اباد د ناامنیو پلانونه وسله والو له همدې ځای تنظیمول.
د ننګرهار د ملي امنیت مشر جنرال نظر علي واحدي وایي، له افغان ځواکونو سره د ولسي خلکو غوڅ ملاتړ وسله وال مات کړل.
خلک وایي، کلونه د وسله والو طالبانو په ولکه کې وو او ژوند یې سخت و.
دوی وایي، اوس یې وسله د وسله والو پرضد پورته کړې او خوښ دي، چې خپلې سیمې ساتي.
ختیځ کې د سرحدي ځواکونو قوماندان جنرال محمد ایوب حسین خېل بیا له وسله والو د نیول شویو سیمو د دایمي امنیت ژمنه کوي او زیاتوي چې هیڅ کله به اجازه و ر نه کړي چې له طالبانو نیول شوې سیمې بیرته د طالبانو لاس ته ولوېږي.
پر ولسي پاڅون کوونکو سربېره دلته د دایمي امنیت لپاره د سرحدي ځواکونو یو کنډک سرتېري هم ځای پرځای شوي دي.
خلک اوس تر امنیت وروسته له حکومتي مسؤولینو د رغنیزو پروژو غوښتنه کوي.
