چاودېدونکي توکي څنګه بیروت بندر ته ورسېدل؟ څنګه چاودنه منځته راغله؟ او په وروستیو شلو کلونو کې په کومو هېوادونو کې د امونیم نایتریت له امله چاودنې رامنځته شوې دي، دلته یې ولولئ.
د ۲۰۱۳ کال په سپټمبر کې یوه کښتۍ د بیروت بندر ته راسیږي، چې امونیم نایتریت په کې بار وه.
دغه کښتۍ چې له جورجیا څخه موزامبیق ته روانه وه، د تخنیکي ستونزو له امله د لبنان چارواکو ورته د تلو اجازه ورنکړه، چې په پایله کې یې د کښتۍ ټولو کارکوونکو کښتۍ پرېښوده.
له دې وروسته د بندر چارواکو په کښتۍ کې بار امونیم نایتریت د دې بندر ګدامونو ته ولېږدول.
د ۲۰۱۴ په جون میاشت کې د لبنان د ګمرکونو رییس شفیق میرهي په یوه لیک کې د مهمو معاملاتو یوه قاضي ته د دغې مسلې د حل غوښتنه وکړه.
په لیک کې غوښتل شوې وو، چې امونیم نایتریت دې یا د لبنان پوځ ته ورکړل شي، بهر ته دې ولېږدول شي یا هم باید د لبنان په دننه په کمپنیو دې وپلورل شي.
د پنځه لیکونو په استولو سره تر ۲۰۱۷ کال پورې د قضایي ارګانونو لخوا د بندر چارواکي ځواب نه ترلاسه کوي.
د بندر چارواکو ته ځواب نه ورکول کیږي، چې په پایله کې یې امونیم پر خپل ځای پاتې او تېره شپه یې چاودنه وکړه.
چاودنه د دوه زره او ۷۵۰ ټنه امونیم نایتریتو چاودنې له امله منځته راغلې ده.
د چاودنې له امله دوه سوه زره تنه بې کوره شوي دي.
تر دې مهاله د سلو تنو وژل کېدل تایید شوي او کابو ۴۰۰۰ ټپیان دي.
لبنان درې ورځې ماتم اعلان کړی دی.
چارواکې وایي، چاودنې له درې تر پنځه میلیارده ډالرو پورې زیان اړولی دی.
په وروستیو شلو کلونو کې د امونیم نایتریت چاودنې
په ۲۰۰۱ یو کال کې د فرانسې په یوې په فابریکې کې د دوه سوه څخه تر درې سوه ټنو امونیم نایتریتو چاودنه وکړه، چې له امله یې ۳۱ تنه ووژل شول او شاوخوا دوه زره او ۴۴۲ تنه ټپيان شول.
په ۲۰۰۳ کال کې هم فرانسې کې امونیم نایتریتو اور اخیستی وه چې له امله یې ۲۶ تنه ټپیان شوي وه.
په ۲۰۰۴ کال کې، د اسپانې ښار کې یوې لارې چې ۲۵ ټنه امونیم نایتریت یې لېږدول، د ټکر له امله چاودنه وکړه چې له امله یې دوه تنه ووژل شول او پنځه نور ټپیان شول.
همدارنګه په ۲۰۱۴ کال کې په شمالې کوریا کې یو ریل ګاډې چې امونیم نایتریت یې لېږدول، چاودنه وکړه چې له امله یې ۱۶۸ تنه ووژل شول او شاوخوا درې زره تنه ټپیان شول.
په ۲۰۱۳ کال کې د امریکا په تګزاس ایالت کې د امونیمو یوې فابریکې کې چاودنه وکړه چې له امله یې ۱۵ ووژل شول او تر ۲۰۰ نور ټپیان شول.
په ۲۰۱۵ کال کې د چین د تیانجن بندر کې نایټروسیلوز په نامه کیماوي موادو اور واخیست چې له امله یې ۸ سوه ټنه امونیم نایتریتو چاودنه وکړه چې له امله یې ۱۶۵ تنه وژل شوي وه او نږدې ۸۰۰ تنه ټپیان شوي وه.
