د اسلامي دولت نومې ډلې (داعش) او نورو ډلو وراخوا، دا ځل په افغانستان کې د القاعدې شبکې د فعال حضور او د سرپرست حکومت په چوکاټ کې يې د ځينو غړو د برحاله دندو لرلو په اړه راپورونه خپاره شوي دي.
د امریکا لانګ وار ژورنال مجلې د ملګرو ملتونو تحليلي ملاتړ او د بنديزونو د څار ډلې وروستي راپور له قوله لیکلي، چې افغانستان د نورو ترهګرو ډلو ترڅنګ د القاعدې شبکې لپاره هم پر امن پټنځای بدل شوی او د دې شبکې غړي د سرپرست حکومت پر ځينو کلیدي بستونو کار کوي.
د راپور یوه برخه:« د القاعده ډېری غړي د طالبانو په حکومت کې د مشرانو او کلیدي فعالینو په توګه دندې ترسره کوي. په دوی کې دوه والیان، د استخباراتو د عمومي ریاست مرستیال او په دفاع وزارت کې د روزنې رئیس شامل دي.»
د دې ادعا تر څنګ یادې مجلې خپله مقاله کې لیکلي، چې اسلامي امارت د القاعدې غړو ته د میاشتني معاش او لګښتونو د ورکولو ترڅنګ د کورنيو چارو وزارت له لوري، د پاسپورټونو او د تذکرو د ویش لړۍ هم پیل کړې.
د راپور یوه برخه:« طالبان د القاعدې غړو ته میاشتنی معاش، مصارف او د افغانستان پاسپورټونه او پېژندپاڼې هم ورکوي چې د پاسپورټونو او هویت کارتونو امر یې د کورنیو چارو وزارت له خوا صادریږي.»
اسلامي امارت بار بار د هېوادونو او رسنیو دا ډول راپورونه او ادعاوې بې بنسټه بللي او د لانګ وار ژورنال دا وروستی راپور هم د تېرو ورته هغو په څېر بې اساسه ګڼي او وايي، د حکومت ټول مسوولین افغانان او د اسلامي امارت غړي دي.
دا لومړۍ ځل نه دی، چې سرپرست حکومت د چارواکو په تړاو دا ډول راپورونه خپرېږي، بلکې له دې وړاندې هم ګڼو سیمهییزو او نړیوالو ناستو کې اندېښنه ښودل شوې، چې افغانستان له تیرو څو میاشتو راهیسې د ترهګرو پر امن پټنځای بدل شوی.
