د ریاست الوزراء اقتصادي مرستیال په ګډون د بېلابېلو ادارو چارواکي او د خصوصي سکټور استازي د جوزجان ولایت قوشتپې او درزاب ولسوالیو ته د برېښنا رسولو پروژې د قرارداد لاسلیک کولو په مخه راټول شوي.
چارواکو په ورځني ژوند کې د برېښنا رول او اړتیا ته په پام، په دې برخه کې د پراختیایي پروژو د زیاتوالي ډاډ ورکوي او زياتوي، د تازه پيلېدونکې پروژې ارزښت ۲۸.۴ ميليون ډالره اټکل شوی چې د درېيو کلونو په موده کې به يې چارې بشپړې او ورسره به ۴۷ زره کورنیو ته برېښنا ورسول شي.
د اوبو او انرژۍ وزارت د نوې کېدونکې انرژۍ رییس عبدالرحمن رحماني وايي: « د جوزجان ولایت قوش تپې او درزاب ولسوالیو ته د برېښنا رسولو پروژه چې د افغانستان اسلامي امارت له خوا تمویلېږي، شاوخوا ۱.۸۶۸ میلیارده افغانۍ لګښت پرې راځي او معادل یې شاوخوا ۲۸ میلیونه امریکايي ډالر کېږي، د افغانستان یوه داخلي شرکت ته ورکړل شوه. له دې پروژې سره به د قوش تپې او درزاب ټول کلي د برېښنا له نعمت څخه برخمن شي.»
د قراردادي شرکت مسوولان بیا خپلو تېرو کړنو ته په کتو ډاډ ورکوي چې د یادې پروژې عملي چارې به هم د ټاکلو معیارونو او لوړ کیفیت په پام کې نیولو سره، د درېیو کلونو په موده کې بشپړې کړي.
د سټېټ کارپس شرکت استازی علاءالدین سلیم وايي: « دا د ۲۲۰ کیلو ولټه برېښنا لېن غځوونه ده چې اوږدوالی یې ۸۵ کیلومټره کېږي. دغه لین له شبرغان څخه قوش تپې او بیا درزاب ولسوالۍ ته ځي. همدارنګه د دوو سب سټېشنونو جوړولو هم دي چې یو یې په قوش تپه او بل په درزاب کې جوړېږي. موږ دغو پروژو ته د تجارت په سترګه نه ګورو بلکې دا ملي پروژې دي او موږ یې کیفیت ته پوره ژمن یو.»
د حکومت د پرېکړې له مخې، ټاکل شوې د دې پروژې ټول لګښت د کانونو له عوايدو ورکړل شي. خلکو ته د برېښنا رسولو په موخه په وروستیو کې د اوبو او انرژۍ وزارت له لوري په پنجشېر کې د پارندې اوبوبند هم ګټه اخیستنې ته سپارل شوی. د چارواکو په خبره، دا بند چې د شاوخوا ۴ مېګاواټه برېښنا تولید ظرفیت لري، نږدې ۴زره کورنیو ته برېښنا ورکولی شي.
