د افغانستان لپاره د ایران ځانګړي استازي او سفیر حسن کاظمي قمي پر خپله ټویټر پاڼه لیکلي، چې په ایران کې یې د ملګرو ملتونو له همغږي کوونکي شتیفان پریزنر سره په کتنه کې په ایران کې د افغان کډوالو د نړیوال ملاتړ په اړه خبرې کړې دي.
قمي زیاته کړې، په ایران کې د مېشتو افغان کډوالو د ملاتړ په اړه له ملګرو ملتونو سره د ډیپلوماسۍ پراختیا د دغه هېواد له موخو ده.
دغه راز قمي ویلي، د ایران روغتیا وزارت او د ملګرو ملتونو د وګړو ملاتړ صندوق ترمنځ د یو شمیر افغان نرسانو او قابلو د روزنې په موخه د همکارۍ هوکړه لیک لاسلیک کړی دی.
حسن کاظمي قمي هېله څرګنده کړې چې دغه هوکړه به په افغانستان کې له ملګرو ملتونو او د هغو له ځانګړو ادارو سره د ایران د همکاریو پراختیا لامل شي.
