د افغانستان بهرنیو چارو چارسمبالي وزیر امیرخان متقي پر مشرۍ یو پلاوی،چې د د استخباراتو مشر هم په کې شامل و، له کابله دوحې ته تللی دی.
دوحه کې د امريکايي استازو او طالبانو د پلاوي تر منځ مذاکرات روان دي،چې ټاکل شوې نن به هم دوام وکړي.
امریکايي پلاوي ویلي،له طالب استازو سره لیدنه اوخبرې د افغانستان د نوي نظام د رسمیت پیژندنې په مانا نه دي،بلکې په افغانستان کې له ترهګرو ډلو سره د مبارزې مسله به د بحث موضوع وي.
امریکايي پلاوی :« په دې ناسته کې د طالبانو حکومت ته په مشروعیت ورکولو او د رسمیت پيژندلو په تړاو بحث نه کېږي. موږ تر دې وړاندې هم په ښکاره ډول ویلي، د طالبانو حکومت د رسمیت پيژندل د دوی کړنو پورې اړه لري.»
له افغانستانه د امریکايي ځواکونو له وتلو وروسته دا لومړی ځل دی،چې د اسلامي امارت او امریکا ترمنځ لېدنه کیږي.
واشنګټن ټینګار کړی دی،چې په دې ناسته کې به پر طالبانو فشار راوړي،چې پر خپلو ژمنو عمل وکړي.
اسلاميامارت ویلي، دوحې ته تللی پلاوی به له قطري چارواکو سربېره د نورو هېوادونو له استازو سره هم وګوري.
اخوا د سیاسي چارو تحلیل کوونکي بیا په اوسنیو شرایطو کې دغه سفر مهم بولي او تمه لري چې مثبتې پایلې به ولري.
د سیاسي چارو تحلیل کوونکی طارق فرهادي وايي:« له کابله قطر ته د تللي پلاوي سفر مهم او مثبت دی،ځکه امریکایان غواړي،چې د ژمي په رارسیدو سره له افغانانو سره بشري مرستې وکړي،چې دا کار همغږۍ ته اړتیا لري او دېته ورته په یوشمیر نورو مسایلو به خبرې وشي. تر ټولو ښه اقدام دا دی،چې دغه سفر د افغانستان د بهرني سیاست د دستګاه له ادرسه ترسره کېږي،چې پایلې به یې مثبتې وي.»
له کابل تللي پلاوي مشري د بهرنیو چارو وزارت چارسمبالی وزیر امیرخان متقي کوي او په پلاوي کې ورسره مله د استخباراتو مشر عبدالاحق وثیق، داطلاتو او کلتور وزارت چارسمبالی وزیر خیرالله خیرخواه، د کورنیو چارو وزارت مرستیال مولوي نور جلال، شیخ شهاب الدین دلاور او حاجي محمد ابراهیم شامل دي.
د مالوماتو له مخې، په قطر کې د اسلامي امارت او امریکا ترمنځ روانې خبرې به دوه ورځې دوام وکړي او د یکشنبې ورځې تر ماښامه به پایته ورسیږي.
