په دوحه کې د اسلامي امارت دفتر ویاند ډاکټر نعیم وردګ ووايي، خبرې بریالۍ دي او هڅه کوي، نړیوالو سره ستونزې د خبرو اترو په چوکاټ کې حل کړي.
وردګ زیاته کړه:« هدف دا ده،چې ستونزې څنګه اوارې شي،څنګه تفاهم ته سره رسېدی شو. موږ بار بار دا خبره کړې ده،امریکا او نورو هېوادونو ته په مجالسو کې بیا یې هم کوو،چې زور او فشار پایله نه لري.ښه خبره دا ده،چې تفاهم ولرو،د فشار پایله لنډمهالې وي.»
ټاکل شوې وه،چې قطر ته د اسلامي امارت دغه پلاوی ترکیې ته لاړ شي،خو وردګ وایي،په دې اړه د اوس لپاره څه نه شته،خو مختلفو هېوادونو سره په اړیکه کې دي،چې ستونزې د خبرو اترو له لارې حل کړي.
وردګ زیاته کړه:« مختلفو هېوادونو سره په اړیکه کې یو،چې وخت په وخت به سفرونه زیاتیږي، دا په حقیقت کې د نړیوالې ټولنې او اسلامي امارت لېوالتیا ښیي،چې غواړي د ناستو پاستو له لارې ستونزې حل شي او دې سره نږدې والی راځي.»
کارپوهان وایي، د سفرونو پایله اوس مهال نه شي څرګندېدای،خو باور لري،چې د طالبانو او نړیوالې ټولنې ترمنځ نږدې والی لیدل،له پخوا ډېر شوی او د دې ډول ناستو دوام کولای شي،افغانستان کې بشري او سیاسي کړکېچ راکم او دا هېواد له نړیوالې اوږدې انزوا وباسي.
په قطر کې افغانستان سره د بشري مرستو، تعلیم، د هوایي ډګرونو د ساتنې او مدیریت او همداراز د امریکايي ولسمشر جوبایډن په فرمان خبرې شوي،چې غواړي د یوه فرمان له لارې د افغانستان کنګل شوې شتمنۍ څخه درې نیم میلیارده یې د سیپټمبر یوولسمې پېښې قربانیانو او پاتې نورې د ملګرو ملتونو په واک کې ورکړي،،هغه څه چې یو شمېر هېوادونو، نړیوالو سازمانونو، افغان حکومت او عام ولس یې غندنه کړې او دغه پیسې چې د افغانستان بانک پشتیبانه ده،یرغمل یې ښکاره غلا بلل کېږي.
