قطر کې د طالبانو او پخوانیو مجاهدینو ترمنځ ناسته کېږي.
طالبانو یوې سرچینې شمشاد ته د درویشت کسیز پلاوي یو لیست ورکړی چې ډیری برخوال یې پخواني مجاهدین دي.
د ناستې په اړه زیات جزیات نه شته خو کار کېږي چې د سولې لپاره یو چوکاټ برابر شي.
تمه ده د طالبانو او مجاهدینو ناسته د امریکا او طالب چارواکو له اووم پړاو خبرو وروسته ترسره شي.
ها خوا د حکومت اجرایه مشر ویلي، هرځل چې د مخامخ خبرو لپاره نوملړ جوړ شوی طالبانو ورسره سلیقوي چلند کړی.
د طالبانو یوې باوري سرچینې دا درویشت کسیزنوملړ شمشاد ته ورکړی چې قطر ته یې د یوې ناستې لپاره بللي دي.
که څه هم د غونډې د سر اجنډا د اوس لپاره پټه ده، خو خبرې داځل د طالبانو او پخوانیو مجاهدینو ترمنځ دي.
سیاسي شنونکی وحید مژده چې دې غونډې ته ورغوښتل شوی یوازې دومره پوهیږي چې ناسته د امریکا او طالبانو له اووم پړاو خبرو وروسته کېدونکې ده.
خو د حکومت اجرایه مشر په باور طالبان د سولې لپاره اراده نه لري او د بهرنیو ځواکونو وتو ته انتظار کاږي.
عبدالله عبداله په وینا هرکله چې د مخامخ خبرو لپاره فهرست برابریږي طالبان ورسره سلیقوي چلند کوي.
د طالبانو او پخوانیو مجاهدینو ترمنځ د ناستې په اړه یوازې دومره ویل کېږي چې د سولې لپاره د چوکاټ برابرول دي.
خو زیاته تمه نه شته چې طالبانو سره له سولې وروسته دې افغانستان کې جګړه پای ته ورسږي.
د ټولو ټینګار د اوس لپاره په اوربند او له حکومت سره د طالبانو په مخامخ خبرو ده چې طالبان ورته تیار نه دي او امریکاسره د خبرو له پای وروسته حکومت سره خپله ستونزه حلوي.
