ټاکل شوې ده چې په نږدې راتلونکي د افغانستان په تړاو د قطر پلازمېنه دوحه کې د ملګرو ملتونو په نوښت نړیواله ناسته جوړه شي او د نړۍ هېوادونو استازي به په کې ګډون وکړي.
که څه هم په دې تړاو په رسمي توګه څه نه دي ویل شي، خو د مالوماتو پر اساس په دغه ناسته کې د اسلامي امارت استازي ګډون کوي.
د سیاسي چارو یو شمېر کارپوهان وايي د دوحې په دې ناسته کې چې د افغانستان په تړاو جوړیږي افغان لوری باید له امریکا سره د افغانستان فضاء اشغال مسله مطرح کړي او نړۍ ته په ډاګه کړي چې واشنګټن لاهم د افغانستان فضاء اشغال کړې.
دوی وايي، د نړۍ مشروع غوښتنو په برخه کې له نړیوالو سره تفاهم ته د رسیدو ترڅنګ د ناستې له ګډونوالو باید وغوښتل شي چې ټول هغه جنګي جنایت کاران چې اوس له افغانستانه وتلي باید د محاکمې میز ته راکاږل شي.
د سیاسي چارو شنونکی توریالی ځاځی وايي:« د قطر په ناسته کې د ا.ا مشرتابه ګډون؛ باید ملي ارزښتونو ته په ډېره جدي توګه پاملرنه وکړي، ځکه دا ډېره جدي مسله ده. له دغو ملي ارزښتونو یو هم د افغانستان هوايي حریم دی. دوی باید په دغه ناسته کې له امریکا څخه د هوايي حریم ژغورلو هڅې وکړي، ترڅو موږ په دې پوه شو چې اوس خپلواک یو. دویم دا چې دوی باید د نړیوالو مشروع غوښتنو په اړه چې هغه د نجونو د ښوونځيو، پوهنتونونو او د مېرمنو د کار مسله ده یو تفاهم ته سره ورسېږي. درېیم دا چې هغه جنګي جنایتکاران چې په هېواد کې یې بشري جنایت ترسره کړي، په ناسته کې د هغوی د محاکمه کولو غوښتنه وکړي.»
ځینې نور بیا په دې باور دي چې د دوحې ناسته به ټولې هغه ستونزې حل کړي چې د افغانستان او نړۍ ترمنځ پرتې دي.
دوی وايي، د دوحې راتلونکې نړیواله ناسته به د افغانستان او نړۍ ترمنځ د ګډو اړېکو ټېنګښت ته لاره پیدا کړي.
د سیاسي چارو شنونکی زمان ګل دهاتي وايي:« نښې نښانې مخکې له دې یې شتون درلود چې بالاخره ځېنې هغه خنډونه چې د .ا.ا او نړۍ ترمنځ شته دا به پای ته ورسېږي او لاره به متقابلو مناسباتو ته هواره کړي؛ نو په دې هکله زما وړاندیز او هیېله دا ده چې د ا.ا پلاوی په بشپړې امادګۍ هلته ګډون وکړي.»
په ټوله کې هغه نړیوالې ناستې چې اجنډا یې د افغانستان پر موضوعات راڅرخي او د افغان حکومت استازو ته په کې ونډه ورکړل شي ګټورې یادیږي.
شنونکي وايي، افغان حکومت باید له دغه ډول ناستو بشپړه ګټه واخلي او نړۍ ته په کې قناعت ورکړي .
د سیاسي چارو شنونکی سرور نیازی وايي:« هره ناسته چې د افغانستان په تړاو جوړېږي او افغانانو ته په کې بلنه ورکول کېږي یا هغه د افغانانو په نوښت جوړېږي؛ له ګټې خالي نه ده.»
څو میاشتې وړاندې هم د ملګرو ملتونو سرمنشي انټونيو ګوتیرېش په نوښت د افغانستان په تړاو په دوحه کې ناسته جوړه شوې وه چې د ګڼو هېوادونو استازو په کې برخه درلوده خو افغان لوري ته په کې د ګډون رسمي بلنه نه وه ورکړل شوې.
