قطر د ملګرو ملتونو۸۰مې عمومي غونډې په څنډه کې د اسلامي همکاریو سازمان د وزیرانو تماس ډلې په لومړۍ ناسته کې، له افغانستان سره پر ګډ ملاتړ او همکارۍ ټینګار کړی.
بهرنیو چارو په برخه کې د قطر دولت وزیر د افغانستان اوسنی سیاسي، اقتصادي او بشري وضعیت د اندېښنې وړ بللی او ټینګار یې کړی چې نړۍ باید د دې حالت پر وړاندې له افغان حکومت سره ګډ ګامونه پورته کړي.
محمد بن عبدالعزیز بن صالح الخلیفي ویلي، هېواد به یې له افغانستان سره بشري، پراختیایي او سیاسي برخو کې خپلو اوږدمهالو هڅو ته دوام ورکوي او په خبره یې، اوسنیو شرایطو کې به له افغان ولس سره پیاوړی شریک پاتې شي.
بهرنیو چارو کې د قطر د دولت وزیر محمد بن عبدالعزیز بن صالح الخلیفي ویلي: « افغانستان کې وروستیو طبیعي پېښو، له ګاونډیو هېوادونو راستنېدونکو کچه کې بې مخینې زیاتوالي او کمزوري اقتصادي وضعیت افغانان سخت ځپلي. هغوی بېړنیو مرستو او له دې اوسني وضعیت سره د مبارزې لپاره ګډ ملاتړ، همکارۍ او اقدام ته اړتیا لري. ډاډ ورکوو چې دوحه به له افغان ولس سره په سختو شرایطو کې یو دایمي پیاوړی شریک پاتې شي.»
الخلیفي همدا راز په دې ناسته کې د اسلامي همکاریو سازمان له غړیو هېوادونو سره په ګډه د افغانستان او نړیوالې ټولنې ترمنځ د تعامل او دوه اړخیزو اړیکو د پیاوړتیا ډاډ هم ورکړی او په خبره یې، د اسلامي امارت او امریکا ترمنځ مذاکراتو ته په پام، قطر بیا هم د سولې لپاره هر ډول مرستې ته ژمن دی.
د چارو شنونکي بیا وروستیو څو کلونو کې د افغانستان یو لړ مهمو قضایاوو کې د قطر رول مهم بولي او خوشبیني ښیي چې په مهمو ناستو کې د افغانستان د وضعیت په تړاو دا ډول څرګندونې، اغېزناک رول لرلی شي.
پخوانی ډېپلوماټ عزیز معارج وايي: « څرنګه چې د قطر هېواد د افغانستان په ټولو قضایاوو او په ځانګړې توګه د سولې له پروسې وروسته ښکېل دی او تل د افغانستان په اړه مثبت فکر او نظر لري، تل یې له هغو هېوادونو سره هم همکاري کړې چې غواړي له افغانستان سره تعامل ولري. اسلامي هېوادونه او د سیمې هېوادونه د قطر خبره اوري، ځکه چې اثر او نفوذ لري.»
د سیاسي چارو شنونکی شهسوار سنګروال وايي: « افغانستان د وروستي ناورین په څېر پېښو په اړه مرستو ته اړتیا لري او دا ډول موسسې چې په ملګرو ملتونو او یا هم د اسلامي همکاریو سازمان په هېوادونو کې شته دي، کولی شي له افغانستان سره مرسته وکړي. د قطر هېواد د وزیر دا خواخوږي د ستاینې وړ ده.»
د نړیوالو اړیکو یو شمېر شنونکي بیا د قطر او نړیوالې ټولنې ترمنځ اړیکو ته په پام هیله مندي ښیي او په خبره یې، د قطري چارواکو دا ډول څرګندونې کولی شي له افغان حکومت سره د نړیوالې ټولنې تعامل ته لار پرانیزي.
د نړیوالو اړیکو شنونکی نجیب الرحمان شمال وايي: « له څرنګه چې پوهېږو، قطر په تېرو څلورو کالو کې له افغانستان سره ښې اړیکې لرلې، له افغانستان سره مرسته کوونکی هېواد و، له نړیوالې ټولنې سره د افغانستان د نښلولو، د نړیوالې ټولنې او سترو هېوادونو د مرستو په جلبولو کې یې هم جدي هڅې کړې دي. په اوسنیو شرایطو کې د افغانستان خلک د نړیوالې ټولنې له ملاتړ پرته له دغو بحرانونو څخه نه شي وتلی.»
د یادونې وړ ده چې افغان حکومت د قطر په ګډون د ملګرو ملتونو۸۰مې عمومي اسمبلې کې د افغانستان د اوسني وضعیت په تړاو د یو شمېر هېوادونو له دریځ هرکلی کړی او ډاډ یې ورکړی چې له ټولو هېوادونو سره د متقابل درناوي پام کې نیولو سره، دوه اړخیزو سیاسي او اقتصادي اړیکو ته ژمن دی.
قطري چارواکي داسې مهال د افغانانو ملاتړ او د اوسنیو شرایطو پر وړاندې د مبارزې لپاره پر ګډ اقدام ټینګار کوي چې کونړ کې له وروستۍ مرګونې زلزلې وروسته قطر لومړنی هېواد و چې له زرګونه زلزله ځپلو سره د مرستې لپاره یې پر خوراکي او غیر خوراکي توکو سربېره درمل، د پلټنې مرستندویه ټیمونه او نور لومړني توکي سیمې ته ورسول.
