د قزاقستان لومړي وزیر مرستیال د افغانستان او پاکستان ترمنځ روان تاوتریخوالي په تړاو ژوره اندېښنه ښودلې او زیاتوي چې استانه د کابل او اسلام اباد ترمنځ منځګړیتوب ته چمتو ده.
سریک ژومانګارین د دغو هڅو اصلي موخه د ډېپلوماټیکو لارو کارول او د تاوتریخوالي پای ته رسول ګڼلي.
په داسې حال کې چې له دې وړاندې ترکیې، متحده عربي اماراتو، قطر او ایران هم د دواړو لورو ترمنځ د سیاسي او امنیتي ناندریو د حل په موخه د منځګړیتوب ورته وړاندیزونه کړي دي.
د قزاقستان لومړي وزیر مرستیال سریک ژومانګارین زیاته کړې: «موږ د کابل او اسلام اباد ترمنځ روان کړکېچ باندې خواشیني یو. دواړه هېوادونه باید خپلې ستونزې او کشالې د خبرو له لارې حل کړي او همدا یې د حل معقوله لاره ده. موږ هم چمتو یو چې د دواړو هېوادونو منځګړیتوب وکړو.»
د قزاقستان د لومړي وزیر مرستیال، سریک ژومانګارین دغه راز ویلي، قزاقستان د اسلامي امارت له بیا واکمنېدو وروسته نه یوازې د ډسمبر په وروستیو کې د هغوی نوم له خپل تور نوملړ څخه ایستلی بلکې د دواړو هېوادونو ترمنځ سیاسي او اقتصادي اړیکې هم ورځ تر بلې په پراخېدو دي.
نوموړی زیاته کړې، د دواړو هېوادونو سفارتونه پرانیستل شوي او دا یې د دواړو هېوادونو د ښو اړیکو یوه بېلګه بللې او ټینګار یې کړی چې د رسمېت پېژندلو مسله به هم په خپل وخت سره وشي.
سریک ژومانګارین په دې اړه زیاته کړې: « زموږ هېواد لومړنی هېواد و چې د اسلامي امارت نوم یې له خپل ملي تور نوملړ څخه لرې کړ. دا اقدام د دواړو هېوادونو ترمنځ د اړیکو د لا پیاوړتیا او رسمي تعاملاتو د پراختیا لپاره یو مهم ګام بلل کېږي. اوس د دواړو هېوادونو سفارتونه پرانستي دي او کابل سره زموږ سیاسي او اقتصادي اړیکې تر بل هر وخت پیاوړي شوې. د رسمېت پېژندلو مسله به هم پر خپل وخت حل شي.»
د قزاقستان مرستیال لومړي وزیر دا هم ویلي چې افغانستان نور ګواښ نه بولي بلکې د سوېلي اسیا بازارونو ته د لاسرسي لپاره یې یو فرصت بولي.
تر دې وړاندې د اسلامي امارت مرستیال ویاند ویلي و چې له اسلاماباد سره د خبرو دروازې پرانستې دي، خو د پاکستان ځینې غوښتنې ریښتینې نه دي او که اسلاماباد پر خپلو دریځونو بیا غور ونه کړي، خبرې به هم کومه پایله ونه لري.
