پاکستان وایي نړیواله ټولنه دې د هغو کړنو مخنیوی وکړي چې د افغان سولې لپاره خنډونه جوړوي.
د پاکستان د بهرنیو چارو وزیر محمود قریشي د افغان سولې په تړاو په جوړ شوي کنفرانس کې د خبرو پر مهال ویلي د افغان سولې د رامنځ ته کېدو لپاره د خنډونو جوړول روان دي چې باید مخنیوی یې وشي.
نوموړي پر ملګرو ملتونو او نورو نړیوالو بنسټونو غږ کړی چې د سولې په راتګ کې مرسته وکړي او دا بهیر وڅاري.
قریشي وایي افغان حکومت او طالبان باید پر خپلو ژمنو عمل وکړي او ژر تر ژره دې د باور فضا د پیاوړي کولو لپاره بندیان خوشي کړي او بین الافغاني خبرې دې پيل کړي.
په کور د ننه بیا عامه باور دادی چې پاکستان هیڅکله افغانانو ته د خیر اراده نه لري، دوی یوازې د افغانستان په ورانۍ کې خپلې ګټې ګوري او هڅه کوي له هر لوري افغانان په ستونزو او کړاو کې راګیر کړي.
