د کورنیو چارو وزارت وايي، افغانستان کې لاهم میلیونونه تنه پر نشه يي توکو روږدې دي او له ډلې يي د زرګونو کسانو درملنه روانه ده.
د دغه وزارت د نشه يي توکو پر وړاندې د مبارزې معینیت ملکي مرستیال عبدالرحمان قاسمي وايي، په تېرو درېیو کالوکې له ۱۰۰ زرو د زیاتو کسانو درملنه شوې او ۹۵ سلنه يي رغېدلي هم دي.
د قاسمي په خبره، افغانستان کې د نشه يي توکو کښت او قاچاق صفر ته ښکته شوی او پر وړاندې يې جدې مبارزه روانه ده.
قاسمي په دې اړه وايي:« له بده مرغه دغه عمل زموږ په ټولنه کې نسبت نورو ټولنو ته ډېر دی. له محتاطۍ سره سم، زموږ په هرو ۱۰ تنو کې یو کس معتاد دی او اټکل کېږي چې ۴ میلیونه معتادان لرو. له هر معتاد کس سره لږ ترلږه ۷ تنه نور متضرر کېږي.»
د کورنیو چارو وزارت د قران شریف نسخه هم نندارې ته وړاندې کړه چې د نشه يي توکو له کارونې د یوه رغېدلي کس له خوا په لاس لیکل شوې.
ورته مهال، د نشه يي توکو پر وړاندې د مبارزې معین عبدالحق همکار وايي، «آغوش» حمایوي او درملیز مرکز کې د ۵ زرو تنو روږدو کسانو درملنه روانه ده چې د درملنې تر څنګ ورته دینې زده کړې هم ورکول کېږي.
د همکار په خبره، د دغو کسانو له ډلې ۳۲ تنو د قرآن کریم حفظ بشپړ کړی او د پاتې کسانو زده کړې روانې دي.
اخوا له نشو رغېدلي کسان هم خوښ دي چې د رغېدو ترڅنګ یې قرآن شریف هم حفظ کړی دی.
دوی له چارواکو غواړي چې د درملنې له مرکزونو تر رخصت کېدو وروسته کاري فرصتونه ورته برابرشي؛ ترڅو بیا ځل پر نشه يي توکو روږدي نه شي.
له نشه يي توکو سره د مبارزې معین همدارنګه وویل، په ټولو ولایتونو کې د روږدو کسانو د راغونډولو لړۍ پیل شوې او د ټولو به درملنه کېږي.
نوموړي له رغېدلو کسانو غوښتنه وکړه چې بیا ځل د نشه يي توکو کارولو ته مخه نه کړي او هغه څه ته ادامه ورکړي چې دلته یې زده کړي.
