ټاکنو کمیسیون ډاډه دی چې ټاکنې په ټاکلې نېټه او بایومتریک سیستم ترسره کوي.
د بایومتریک په واسطه د ټاکنو ترسره کېدو په تړاو نیوکې دي چې عملي نه ده او په کم وخت کې ترې کار نه شي اخیستل کېدی.
په ټاکنو د څار بنسټونه باور لري چې کمېسیون د عامه ذهنیت تېرایستلو لپاره د بایومتریک موضوع راپورته کړې خو له تخنیکي پلوه نیمګړې ده.
ټاکنو کمېسیون بیا ټینګار کوي چې بایومتریک باوري او د عمل وړ سیستم دی چې د میزان په اته ویشتمه به ترې کار واخیستل شي.
ټاکنو کمېسیون اعلان کړی چې پارلماني ټاکنو کې به له بایومتریک سیستم نه کار اخلي، خو د همدې سیستم په تړاو اندېښنې دي چې عملي نه ، یو خیالي سیستم دی.
ټاکنو کمېسیون له جرمني کمپنۍ سره خبرې کړي چې یوه اوونۍ وروسته بایومتریک سیستم افغانستان ته را وراد کړي.
خو د بایومتریک په تړاو په ټاکنو د څار بنسټ (فیفا) مشر یوسف رشید منفي نظر لري چې په کم وخت کې د ګټې اخیستنې وړ نه دی.
په سر کې د سیاسي احزابو له غوښتنې سره سم ټاکنو کمېسیون له بایومتریک سیستم سره مخالفت ښودلی وو چې اوس یې وخت نه دی.
ټاکنو کمېسیون د ملي ایتلاف له لورې په ټاکنو کې د جعلي تذکرو له ښودلو وروسته هڅې چټکې کړي چې بلاخره له کمپنۍ سره په مشخصو شرایطو هوکړې ته ورسېدل.
ټاکنو کمېسیون د ټاکنو په ورځ د رای ورکولو۲۱ زره محلونو ته بایومتریک سیستم لېږدوي او د هر رای ورکوونکي د ګوتو نښې او عکس سیستم ته داخلېږي.
دې سیستم ته خوشبیني شته چې د تکرار او په جعلي تذکرو رای اچونې مخنیوی به وکړي.
ټاکنو کمېسیون له حکومت غوښتي چې د بایومتریک سیستم لپاره د بودیجې غم وکړي.
ټاکنو ته ۲۷ ورځې پاتې خو تر اوسه بایومتریک سیستم افغانستان ته نه دی وارد شوی او دغه سیستم دلته تجربه شوی هم نه دی.
