فیفا د ولسي جرګې د ټاکنو د پایلو ځنډ سره یو ځای انديښنه لري چې د ولسمشریزو ټاکنو نېټه به وځنډېږي.
له ټاکنیزو کمېسیونونو غوښتنه ده چې د لا زیاتې روڼتیا او عدالت په موخه د رایو د بیا شمېرنې، قرنطین او څېړنې پړاونو ټول جزیات دې له نوماندانو سره شریک او څاروونکو ته دې د څار فرصت برابر کړي.
د افغانستان د ازادو او عادلانه ټولټاکنو ټولنیزه مؤسسه یا فیفا د ټاکنیزو شکایتونو کمېسیون څخه غواړي چې د شکایت کوونکو د پوهاوي کچې ته په پام څېړنو کې سخت چلند و نه کړي.
له دې سره فیفا له ټاکنیزو کمېسیونونو غوښتنه وکړه چې د ټولو هغو کسانو نومونه ډاګیز کړي چې فشارونه پرې راوړي او ګواښونه کوي.
پر ټاکنیزو کمېسیونونو نیوکه ده چې د رایو د بیا شمېرنې، قرنطین او څېړنې پړاو کې یې د نوماندانو څاروونکو ته خبر نه دی ورکړی.
فیفا وړاندیز کوي چې د ګڼې ګوڼې د ختمولو لپاره دې یو مهالوېش جوړ او د نوماندانو له دفترونو سره شریک شي، چې د همغه پر بنسټ نوماندان خپل څارونکي محل ته ولیږي.
له دواړو کمېسیونونو غوښتنه ده چې د نوماندانو او د استازو منلو برخه کې یې ولایتي او مرکزي دفترونه پرانستي او تخصصي چلند وکړي.
دا چې کمېسیونونه د ولسمشریزو ټاکنو په درشل کې دي، فیفا له ټولو په واک او له واکه بیرون ډلو غوښتنه وکړه چې خپلې ټولې چارې د قانون له مخې تنظیم کړي، له وخت وړاندې کمپاینونو او له دولتي امکاناتو ګټه اخیستنه دې نه کوي.
