د افغانستان اسلامي امارت یوځل بیا ټینګار کړی چې له ټولې نړۍ سره ښې او پر متقابل درناوي ولاړې اړیکې غواړي.
د اسلامي امارت مرستیال ویاند حمد الله فطرت وايي، کابل د هېوادونو ترمنځ پر سیاسي تعامل باور لري او دا د ټولو لوریو پر ګټه بولي؛ په همدې موخه د مسکو له هغې پریکړې هرکلی کوي چې غواړي د اسلام امارت نوم د ترهګرۍ له لېست څخه وباسي.
د فطرت په خبره، نور هېوادونه هم باید ورته ګام پورته او تعامل ته را وړاندې شي.
هغه په دې اړه وايي: « د روسیې فډراسیون دا پرېکړه د ستایلو ده چې غواړي اسلامي امارت د دې هېواد د ممنوعه ډلو له لېست وباسي. موږ دا د اړیکو د پراختیا او تعامل په برخه کې ګټور ګام بولو. د افغانستان اسلامي امارت پر تعاملاتو باور لري او د ټولو پر ګټه یې ګڼي. ښه به دا وي چې نور هېوادونه هم ورته ګامونه پورته کړي.»
د سیاسي چارو کارپوهان وايي، په کابل کې د یوشمېرهېوادونو د سفارتونو فعالیت او له اسلامي امارت سره اړیکو ته په کتو، تمه کېږي چې نږدې راتلونکي کې به د سرپرست حکومت د سیاسي اړیکو لمن لاپسې پراخه شي.
د سیاسي چارو کارپوه محمد حسن حقیار په دې اړه وايي: « سره له دې چې نړۍ افغانستان پر رسمیت نه پېژني، خو بیا هم له نړۍ سره اړیکې پراخې شوې او سیاسي پرمختګونه شوي دي. په یو شمېر هېوادونو کې د افغانستان سفارتونه خلاص دي او یو شمېر هېوادونو په کابل کې هم خپل سفارتونه پرانستي دي. د نړۍ هېوادونه د امریکا او ناټو ګواښونو ته ګوري، زه ډاډه یم چې دا اړیکې به نږدې وخت کې نورې هم ټینګې شي.»
ځېنې نور بیا په دې اند دي چې د افغانستان د سرپرست حکومت په تړاو د مسکو له دغې پرېکړې سره به سیمه کې ډاډ رامنځته او سیاسي تعامل ته به زمینه برابره شي؛ خو له لوېدیځ سره د افغانستان د ستونزو حل لپاره باید د مسکو فارمټ په څېر ځانګړې تګلارې جوړې شي.
د پوهنتون استاد فیض محمد ځلاند وايي: « دا چې مسکو اعلان کوي د ترهګرۍ له لېست د سرپرست حکومت مشران باسي، دا یو ښه پرمختګ دی او له دې سره به د تعامل لپاره زمینه لاپراخه شي. له دې پرېکړې سره په سیمه کې ډاډ رامنځته کېږي، د همکارۍ او همغږۍ روحیه پياوړې کېږي. زما په اند، ورته ناستې کولی شي له سیمې سره د اسلامي امارت ستونزې حل کړي خو له لوېدیځ او په ځانګړې توګه امریکا، ناټو تړون، اروپايي ټولنې او اسلامي هېوادونو سره زموږ د اړیکو ښه کېدو لپاره باید په ورته فارمټونو کې خبرې وشي او شته واټن له منځه یوړل شي.»
د سیاسي چارو کارپوه شهزاده مسعود د ملي ګټو پربنسټ له نړۍ او سیمه ییزو هېوادونو سره د افغانستان د اړیکو ټینګښت مهم بولي او وايي، باید دغه اړیکې جوړې شي.
د د مسعود په باور، نړۍ هم افغانستان ته اړتیا لري خو په کار ده چې دواړه لوري د دغو اړیکو ټینګښت لپاره هڅې وکړي.
هغه زیاتوي:« په اوسنیو شرایطو کې له هرڅه وړاندې دا غوره ده چې افغانستان د یوه مثبت تعامل په چوکاټ کې له ټولې نړۍ سره اړیکې ټینګې کړي. زموږ ملي ګټې ایجابوي چې له نړۍ سره روابط ولرو. نړۍ هم اړتیا لري چې د خپلو ګټو لپاره له افغانستان سره اړیکې جوړې کړي. زه هیله من یم چې د دغو اړیکو جوړولو لپاره نړیواله ټولنه او سرپرست حکومت دواړه کار وکړي.»
دا په داسې حال کې ده چې نړیوالې ټولنې او په ځانګړې توګه د امریکا متحده ایالتونو د افغانستان حکومت د رسمیت پېژندنې لپاره د نجونو زده کړې او د ښځو کار د شرط په توګه وړاندې کړي، هغه څه چې اسلامي امارت یې د افغانستان داخلي ستونزې بولي او زیاتوي چې په دې اړه څرګندونې کول د افغانستان په کورنیو چارو کې لاسوهنه ده.
