د اسلامي امارت مسوولینو د رسنیو او د مطبوعاتو ملاتړو بنسټونو له استازو سره ګډه خبري غونډه کې هغه ګنګوسې رد کړې چې وايي، سرپرست حکومت د رسنیو پر وړاندې خنډونه جوړوي او غواړي بندې یې کړي.
د اسلامي امارت مرستیال ویاند حمد الله فطرت په هېواد کې له فعاله رسنیو د هراړخیز ملاتړ ژمنه یو ځل بیا تازه کړه.
فطرت په دې وايي، سرپرست حکومت د رسنیو اهمیت او ارزښت درک کړی او ملاتړ یې کوي.
د اسلامې امارت مرستیال ویاند زیاته کړې: « پر رسنیو د محدودیتونو د وضع کېدو په اړه چې ځینې تبلیغات او پروپاګند اورېدل کېږي، د دې نوي رسنیز آدرس د پيل کېدو اعلان خپله په دې ټولو ناسمو تبلیغاتو د بطلان کرښه راکاږي. د افغانستان اسلامي امارت ملي، شرعي او اسلامي ارزښتونو ته د درناوي په چوکاټ کې رسنیو ته پوره آزادي ورکوي او ورسره همکار دی.»
په دې غونډه کې د خبریالانو د خوندیتوب کمېټې مشر د رسنیو پر وضعیت، لاسته راوړنو او پر وړاندې یې شته ننګونو خبرې وکړې او د پخوا پرتله یې د رسنیو وضعیت ښه یاد کړ.
عبدالقدیم ویاړ زیاته کړه، په تېرو درې نیمو کالو کې د شاوخوا۴۰ رسنیو او سلګونه خبریالانو مالي ملاتړ شوی.
ویاړ زیاته کړې:« د خبریالانو شغلي او فزیکي مصؤنیت لپاره چې کوم څه زموږ په توان کې دي، هغه مو کړي او کوو یې. دغه راز د حکومت له اړخه همکاري موجوده وه، وعدې شوې دي. موږ له ۴۰ رسنیو مالي ملاتړ کړی او دا خپله د خبریالانو د شغلي مصؤنیت لپاره یو ستر ګام دی؛ همدارنګه له ۲۵۰ تنو خبریالانو سره نغدي مرستې شوې.»
همدارنګه د ملي شورا پخواني غړي او سیاستوال ډاکتررمضان بشردوست هم په دې غونډه کې وینا وکړه او په ټولنه کې یې د رسنیو رول اغېزناک یاد کړ.
بشردوست له سرپرست حکومته غوښتنه وکړه چې په هېواد کې د فعاله رسنیو ملاتړ وکړي.
ډاکټر رمضان بشردوست وویل:« رسنۍ کولی شي اساسي او ستر رول ولوبوي. رسنۍ کولی شي د خلکو او ټولنې حقایق، ستونزې، دردونه، رنځونه او غمونو ته انعکاس ورکړي. دغه راز رسنۍ کولی شي خوښۍ، کامیابۍ او بریالیتوبونو ته هم انعکاس ورکړي.»
د سرپرست حکومت او خبریالانو د ملاتړ بنسټ مسوولینو دغه څرګندونې په کابل کې د یوه خصوصي خبري آژانس په پرانیست غونډه کې وکړې.
دغه بنسټ داسې مهال خپل فعالیت اعلانوي چې څو ورځې وړاندې د بېګم په نوم یوې راډیو فعالیتونه ځنډول شوې و او بېرته یې خپل نشراتي فعالیت پيل کړل.
