د سرحدونو، قومونو او قبایلو چارو وزارت ویاند حمدالله فطرت له شمشاد سره په یوې مرکه کې ویلي، په تېرو دوو کلونو کې په بېلابېلو ولایتونو کې د قومونو او کورنیو ترمنځ څه باندې ۷۰۰ لویې او کوچنۍ شخړې حل شوې دي.
د فطرت په خبره، د ځينو کورنیو پر ځمکې او بېلابېلو نورو مسایلو شخړې چې له امله یې سلګونه کسانو ته مرګ ژوبله اوښتې، د دودیزو، ملي او افغاني جرګو مرکو له لارې او د اسلامي اصولو په رڼا کې حل او په دوستۍ بدلې شوې دي.
فطرت زیاتوي: « د شخړو په برخه کې د اسلامي امارت له بیا واکمنېدو تر دې مهاله څه کم اووه سوه شخړې حل شوې دي او د پخوانیو ارقامو له مخې په دې کې ۶۷۰ کسان وژل شوي او مالي او ځاني تلفات یې درلودل. په دې کې د نورستان د دوو قومونو ترمنځ تر ټولو لویه شخړه وه چې نږدې ۹۱ کاله وروسته حل شوه. دغه راز د هېواد په نورو ولایتونو، لکه خوست، پکتیا کاپیسا، کندهار، ننګرهار، پروان او نورو ډېری ولایتونو کې موږ شخړې حل کړې دي. د روان کال په دې ربع کې نږدې ۹۷ شخړې حل شوې دي او لا هم په نورو شخړو کار روان دی.»
فطرت وایي، د اسلامي امارت د مشرتابه د حکم پر بنسټ یې د یوه کمېسیون په چوکاټ کې، له ایران، ازبکستان، ترکمنستان، تاجکستان او چین سره د سرحدونو د ټاکلو او د سرحدي نښو نویو کولو په برخه کې ۱۲ سلنه چارې بشپړې شوې دي.
هغه زیاته کړه: « موږ د سرحدونو په برخه کې له تاجکستان، ازبکستان او ترکمنستان هېوادونو سره هم مشترکې کمېټې لرو، چې په دې هم کار روان دی. په ځېنو برخو کې لکه څنګه چې ما یادونه وکړه له تاجکستان، ازبکستان او ترکمنستان سره سرحدي ناستې شوې دي او لا هم روانې دي، دا یوه اوږده پروسه ده، وخت به نیسي او تر دې دمه تر ۱۰ یا ۱۲سلنه چارې پرمخ تللي دي.»
په ورته وخت کې فطرت وايي، اسلامي امارت ته افغان خاوره د مور حثیت لري او له یوې لوېشتې خاورې به هم چاته تېر نه شي.
هغه زیاته کړه: « تاسې په اورېدلې وي چې هېوادوالو ته ډاډ ورکول شوی چې د هېواد پولې، او ځمکنۍ بشپړتیا اسلامي امارت ته سره کرښه ده او چاته به یوه لوېشت ځمکه هم پرې نه ږدي. خاوره مور ده او د مور حیثیت لري، په هېڅ صورت او په هېڅ قیمت به تر خپلې خاورې تېر نه شو. د هېواد په ټول قومونو؛ که هغه ازبک دي، که تاجک، هزاره او یا ترکمن دي ټول د هېواد ښکلا ده او د دې وزارت یوه مهمه برخه تشکیلوي. دغه راز د سرحدونو موضوع که موږ تاریخ ته وګورو، پخوا هم د افغانستان سرحدونه، قومونو او قبایلو ساتلي دي.»
د فطرت وینا، د سرحدونو، قومونو او قبایلو چارو سرپرست وزیر د هېواد شمالي ولایتونو او نورو ټولو برخو ته د سفر پر مهال د خلکو ستونزې اورېدلي او د حل په موخه یې ډاډ ورکړل شوی.
