د اسلامي مارت دفاع وزارت لوی درستیز قاري فصېح الدین فطرت د عبدالله بن مسعود د جګړه ییزو ګډو زده کړو قوماندانۍ د ۷۰۰ تنو منسوبینو فراغت غونډه کې د اسلامي اردو پر پوځي او فکري زده کړو او روزنې ټینګار کړی.
فطرت وايي، هڅه کېږي د افغانستان وسله وال پوځ په پرمختللیو وسلو او مهمو پوځي تجهیزاتو سمبال شي.
د فطرت په خبره، له اسلامي اردو جوړولو موخه له نورو هېوادونو سره جګړه نه بلکې د خپل هېواد له پولو او اسلامي ارزښتونو ساتنه او دفاع ده.
لوی درستیز زیاتوي، له ټولو هېوادونو سره د خبرو له لارې تعامل غواړي خو ترڅنګ یې خبرداری ورکوي که څوک د زور کارولو هڅه وکړي، له سخت ځواب سره به مخ شي.
فطرت په دې اړه وايي:« د اسلامي اردو له جوړولو هدف له ګاونډیانو او نورو هېوادونو سره جنګ نه دی، بلکې د خپل هېواد د سرحدونو او اسلامي ارزښتونو دفاع او ساتنه ده. موږ له ګاونډیو او نړیوالو هېوادونو سره د زور وهلو او جنګ اراده نه لرو. د خبرو او مصالحې له لارې له ټولو سره تعامل غواړو، خو که څوک د زور هڅه وکړي، داسې ځواب به ورکړو لکه درې نورو زبرځواکو ته مو چې مخکې ورکړی دی.»
د پوځي چارو کارپوهان بیا وايي، په سیمه کې روان وضیعت او د ګاونډیانو پوځي رقابتونو ته په کتو افغانستان حق لري چې د خپل هېواد له ځکمنۍ بشپړتیا د دفاع لپاره پر اړینو پوځي تجهیزاتو سمبال او پر پوځي زده کړو روزل شوی ځواک ولري.
د پوځي چارو شنونکی یوسف امین ځاځی وايي: « موږ باید د اوسني عصر له غوښتنو سره سم وسله وال پوځ ولرو؛ ځکه کله چې موږ نړۍ او ګاونډیانو ته ګورو چې په کومو وسلو سمبال دي، موږ باید له دې هم پورته کوشش وکړو، ترڅو د افغانستان د خلکو، خاورې او ځمکنۍ بشپړتیا ساتنې لپاره قوي ترین دفاع وزارت او وسله وال پوځ ولرو. دا یوه اړتیا او یو اصل دی.»
ځینې نور بیا په دې باور دي چې پر افغانستان تل د زبرځواکو هېوادونو له خوا یرغل شوی او اوس داسې یوې ځواکمنې اردو ته اړتیا ده چې د افغانستان ستونزو او دغه راز د پردیو یرغلونو پر وړاندې ځواب ویونکې وي.
د سیاسي چارو شنونکی سلیم پیګیر وايي: « افغانستان تل د زبرځواکونو هېوادونو تر یرغل لاندې و. د یوه داسې وسله وال پوځ لرل چې قوي، پیاوړی او سمبال وي، د افغانستان یوه اړتیا ده.»
د اسلامي امارت ملي دفاع وزارت له خوا خپره شوې اعلامیه کې راغلي، د جګړه ییزو ګډو زده کړو قوماندانۍ ۷۰۰ تنو فارغ شویو منسوبینو د درېیو میاشتو په موده کې د پوځي زده کړو ترڅنګ عقیدتي او فکري زده کړې هم ترلاسه کړې دي.
