فاریاب کې پر ملکي خلکو هوايي برید کې د دوو کورنیو دولس تنه وژل شوي دي.
د فارياب ولايت ګرزيوان ولسوالۍ کې تېره شپه په یو کور هوایي برید شوی چې د دوه کورنیو دولس غړي پکې وژل شوي دي.
د فاریاب د ولایتي شورا غړی صبغت الله سيلاب وایي، چې وژل شوي ټول ملکي وګړي دي چې په ډله کې یې اته ماشومان هم شامل دي.
اخوا بیا د فرا ولایت د انار درې ولسوالۍ د امنیه قوماندان د کورنۍ شپږ غړي د سړک غاړې په ماین چاودنه کې وژل شوي دي.
د اناردرې ولسوالۍ د امنیه قوماندان پر موټر د سړک غاړې دغه ماین چاودنه نن ماسپښین شاوخوا یوه بجه شوې ده .
د فرا امنیه قوماندانۍ ویاند محب الله محب وايي، ماین د اناردرې ولسوالۍ امنیه قوماندان د کور مخې ته ايښودل شوی و خو قوماندان په موټر کې نه و، اولادونه یې پکې وژل شوي دي.
