افغان ولسمشر محمد غني د لوبې بدلون تر عنوان لاندې یوه لکچر کې د خبرو پر مهال ویلي، افغان حکومت سولې ته ژمن دی،خو د پاکستان په خبرو او عمل کې توپير دی.
ولسمشر غني وايي، د افغانستان سوله د پاکستان په ګټه ده او که دغه هېواد خپلې خبرې او عمل یو شان نه کړي، نو افغان حکومت اړ دی،چې لومړی له دوی سره د سولې په لټه کې شي او بیا له طالبانو سره سوله وکړي.
هغه ټینګار وکړ،چې پاکستان لا هم په سېمه کې د ترهګرو ډلو ملاتړی دی او پر دې واقعیت سترګې نه شي پټېدلی.
ولسمشر غني همدا راز وویل، طالبان باید له افغان حکومت سره یو ځای شي او ټینګار یې دا وه،چې دغه ډله د زور او وسلو له لارې بریا ته نه شي رسېدلی.
په ورته وخت کې هغه طالبان، بهرني وسله وال، پاکستان، سیمه ییزه لاسوهنه او د بازار سقوط د بهرنیو ځواکونو له وتلو وروسته وضعیت کې د احتمالي خطرونو په توګه یاد کړي دي.
اشرف غني وايي، د ملي حاکمیت اصلاحات او پیاوړتیا، نړیوال ګډون، سیمه ییزه همکاري، له ترهګرۍ سره د مبارزې ائتلاف او د سولې پروسه په دې لړ کې شته فرصتونه دي.
