د اطلاعاتو او فرهنګ وزارت مسوولین وايي، د لوی اختر په شپو ورځو کې شاوخوا ۲.۵ ميليونه داخلي سيلانيانو د هېواد له بېلابېلو سيمو ليدنه کړې.
د دې وزارت ویاند خبیب غفران د یوه مطبوعاتي کنفرانس کې د خبرو پرمهال وویل، د تېرو کالونو په پرتله د داخلي سيلانيانو شمېر زيات شوی او دا مهال خلک د تفريحي او تاريخي سيمو د ليدلو زياته لېوالتيا لري.
غفران په دې اړه وايي: « له ټول افغانستان موږ ته رارسېدلې شمېرې ښيي چې له ۲.۵ میلیونو زیات هېوادوالو یوازې په تېر لوی اختر کې د افغانستان له مختلفو ولایتونو او سیمو لیدنه کړې. له موږ سره تر ډېره د پکتیا ولایت او دغه راز د نورستان، کونړ، لغمان او غزني ولایتونو شمېرې شته چې ډېرو کسانو ترې لیدنه کړې. دغه راز د اطلاعاتو او کلتور وزارت اطمینان ورکوي چې امکاناتو ته په کتو به کال په کال هڅه وکړو د سیاحت په ډګر کې په ټولو هغو ځایونو کې چې کورني او بهرني سیلانیان د سیاحت په موخه سفر کوي، هلته اړین خدمتونه وړاندې کړو.»
د اطلاعاتو او کلتور وزارت هڅه کوي چې د هېواد په ټولو تفريحي سيمو کې سیلانيانو ته لازمې اسانتیاوې برابرې کړي.
