پر غزې تراړې د اسرائیلو بریدونه د می میاشت کې حماس سره له شخړو وروسته پیل شول،چې یوولس ورځې جکړې دوام وکړ.
دې کړکېچ په سیمه کې سختې ویجاړۍ را منځ ته کړې او د غزې د روغتیا وزارت د مالوماتو له مخې،۲۵۳ کسان په کې وژل شوي او ۱۹۴۸ نور ټپیان دي.
محمد عطار یو د هغو کسانو له ډلې دی،چې په دې بریدونو کې یې خپل درې ماشومانو او مېرمنه له لاسه ورکړي.
د غزې اوسېدونکی محمد عطار وايي: « دا زما کور وو. دلته مې له خپلې مېرمنې او ماشومانو سره ژوند کاوه. کله چې دلته بمبار وشو، دا کور ونړېده. زه د دروازې چوکاټ لاندې ژوندی پاتې شوم او کله چې له نړیدلې ودانۍ بهر راووتم، د خپلو ماشومانو او مېرمنې په اړه مې پلټنه پیل کړه. ما مې ماشومان تیاره کې د لاسي څراغ د رڼا په مرسته لټول.»
عطار وايي،اوس هڅه کوي،چې د خپلو ماشومانو او مېرمنې یوازې له یو څو انځورونو سره ژوند وکړي.
هغه زیاته کړه:« دا امیره ده،هغه شپږ کلنه ده. دا سلیم دی او هغه یوازې د اتو کلونو دی. دې تصویر کې امیره او سلیم دواړه راغلي، دوی کور کې کوترې ساتلې وې. دا تصویر یې له کوترو سره اخېستی دی.»
که څه هم محمد عطار خپله د ویر په ټغر ناست دی؛ خو له بل پلوه د خپل هغه ورور پالنه هم ورغاړې ده،چې په همدې جګړو کې سخت ټپي شوی.
دا دواړه وروڼه وايي، دندې یې هم له لاسه ورکړي او په خبره یې اوس مهال سختې شپې ورځې سبا کوي.
د محمد عطار ورور اېهاب عطار وايي:« موږ دندې له لاسه ورکړې او له کنډوالو مو هم کوم ګټور څه ترلاسه نه کړل. موږ هېله لرو،چې څومره ژر کېږي، خپل ویجاړ شوي کورونه بیا ورغوو.»
د اسرائیلو او حماس تر منځ نښتې د می میاشتې په یوویشتمه نېټه د مصر په منځګړیتوب د اوربند په پایله کې پای ته ورسېدلې.
د غزې اوسېدونکي وايي، د اوربند هوکړه به د دوی معنوي، روحي او فزیکي ټپونه په سختۍ ورغوي او کورونه به یې ویجاړ پاتې وي.
