د غزني ولایت قره باغ ولسوالۍ اړوند موشکي سیمه کې د ۳۰ میلیونه افغانیو په لګښت یو باب دارالايتام د ترکیې آی.اېچ.اېچ موسسي له لوري جوړ او ګټې اخیستنې ته وسپارل شو.
چارواکي وايي، دغه دارلایتام په ۷۳۵مترمربع ځمکه کې جوړشوی او د اړتیا وړ ټولې اسانتیاوې لري او په کې یتیمانو ته عصري او دیني زده کړي ورکول کېږي.
د چارو ادارې د ښاروالیو رییس مولوي محمد اسحاق اخوندزاده وايي: « د دې دارالایتام لیلیه د ۱۰۰ کسانو په ظرفیت له ۱۴ تر ۱۸ بابو خونې لري. په دې خونو کې تدریسي، د ماشومانو د اوسېدلو او د ښوونکو لپاره د ناستي خونې شاملې دي. راتلونکي کې هڅه کووو، نورې خونې هم جوړې او ظرفیت یې لوړ کړو.»
په افغانستان کې د ترکيې آی. اېچ.اېچ موسسې مسوول امراکایا وايي، تر خپله وسه به له افغانانو سره مرستو ته دوام ورکوي او اوږه په اوږه به د افغانستان په جوړولو کې برخه اخلي.
هغه زیاتوي: « ستاسې مشران زموږ مشران دي او همدارنګه يتيمان زموږ يتيمان دي. موږ ستاسو بېوزله خلک هم خپل بولو. دا د همدې لپاره ده چې له دوی سره مرستې کوو.»
بله خوا، د اقتصاد وزارت سرپرست دین محمد حنیف په تېرو کلونو کې د موسسو پر کار نيوکه کوي او وايي، موسسو په تېره کې د افغانستان د ودې لپاره بنسټیز کارونه نه دي کړي.
حنیف زیاتوي: « په تېرو ۲۰ کلونو کې د جمهوریت په نوم یوه اداره وه چې د امریکا او ۴۸ هېوادونو ملاتړ یې له ځانه سره درلود. د بیا روغونې په نوم زیاتې پیسې راغلې او مصرف شوې. د افغانستان د بیارغونې لپاره د امریکا ځانګړي سرمفتېش یا سیګار کانګریس ته په خپل راپور کې وویل چې په ۲۰ کلونو کې د افغانستان پر بیا رغونه ۱۴۴ میلیارد ډالره لګول شوي.»
په ورته حال کې، د سیمي خلک هم د دې دارالايتام جوړېدو له امله خوښ دي او وایي، سرپرست حکومت دې د ښوونیزو مرکزونو جوړولو ته لومړيتوب ورکړي.
د غزني یو تن اوسېدونکی وايي: «دا ځای زموږ د شهیدانو د پاتې شویو یتیمانو لپاره جوړ شوی، موږ ډېر خوشاله یو او غواړو دغه شان نور ځایونه جوړ او مرستې وشي.»
همدارنګه هغه یتیمان او بې سرپرسته ماشومان هم خوښي څرګندوي چي ټاکل شوې په دې دارلایتام کې زده کړې وکړي.
د دارالایتام یو تن زده کوونکی وايي: «دغه ځای زموږ د روزنې لپاره جوړ شوی ترڅو موږ دلته اخلاق زده کړو، تعلیم وکړو او د مور او پلار عزت زده کړو.»
یو بل زده کوونکی بیا وايي: «موږ به دلته د علم زده کړه کوو او په دې به پوه شو چې د مور او پلار او مشرانو درناوی وکړو.»
د یادونې وړ ده چې له دې وړاندي هم د غزني په ځینو ولسوالیو کې د یتیمانو او بې سرپرسته ماشومانو لپاره د زده کړې او روزنې ورته مرکزونه جوړ شوي دي.
