له هغې وروسته چې په دې ورستيو کې یو شمېر رسنیو او خلکو دا اندېښنې راپورته کړې چې د پاسپورټونو د وېش په لړ کې پراخ فساد موجود دی او د دې رياست چارې شفافې نه دي، د پاسپورټ ریاست دغه اندېښنې رد او پروپاګند وګڼلې.
شمشاد ته د دې رياست وياند قاري عمر لوګری د فساد په اړه راپورته شوې اندېښنې او څرګندونې رد کړې او وايي، دا مهال د پاسپورټ وېش پروسه په پوره ډول شفافه ده او هېڅ ډول فساد په کې نه شته.
لوګری په دې اړه وايي: « دا او دې ته ورته پروپاګند چې رسنۍ یې خپروي چې ګواکي د پاسپورټ په ریاست کې فساد لا ادامه لري او کارونه یې له خنډ او ځنډ سره مخ دي، دا له حقایقو لرې دي او موږ یې په کلکه ردوو. د پاسپورټ ریاست چارې اوس د لمر په څېر روښانه دي او مراجعینو ته بېړني خدمات وړاندې کوي.»
د پاسپورټ رياست وياند ډاډ ورکوي چې هېچا ته اجازه نه ورکول کېږي چې د پاسپورټونو د وېش په بهیر کې فساد وکړي.
د لوګري په وينا، دوی هڅه کوي کور په کور د پاسپورټ وېشلو لپاره په ټولو ولايتونو کې اړينې اسانتياوې رامنځته کړي او په دې برخه کې د رياست له خوا اړين اقدامات ترسره شوي هم دي.
لوګری زیاتوي: « د نوم لیکنې له لارې په یوه اوونۍ کې د پاسپورټ وېشلو لړۍ روانه ده او دا مهال د پاسپورټ په وېش کې هېڅ ډول ستونزه نه شته.»
د پاسپورټ ځينې غوښتونکي د پاسپورت په ترلاسه کولو کې له رامنځته شویو اسانتیاوو خوښ دي او مراجعانو ته د وېش په پروسه کې د ورته نورو اسانتياوو رامنځته کولو غوښتنه هم کوي.
د کابل ښار اوسېدونکی مجیب الرحمن وايي: « واقعا ً هغه سهولتونه چې د پاسپورټونو د ثبت، بایومټریک او وېش په برخو کې رامنځته شوي، زه او د کابل ټول ښاریان ترې خوښ یو. له دولت غوښتنه کوو چې له دې هم زیات سهولتونه خلکو ته رامنځته کړي، ترڅو په اسانه توګه وکولی شي خپل پاسپورټونه ترلاسه کړي.»
دا په داسې حال کې ده چې د هنلي موسسې د تازه راپور پر بنسټ، د افغانستان پاسپورټ لاهم د نړیوالې درجه بندۍ په پای کې ځای لري او د دې پاسپورټ لرونکي کولی شي یوازې د نړۍ ۲۶ هېوادونو ته له ویزې پرته سفر وکړي.
