د پاکستان لومړي وزیر عمران خان ویلي، دوی به هېڅ کله هم فشار ته تسلیم نه شي او د پخوا په څېر به ذلت ته تن ورنه کړي.
خان پر پخوانیو حکومتونو هم نیوکه وکړه،چې د امریکا د ګټو لپاره یې خپل ولس وژلی دی.
خان د ګیلې په ډول ویلي، سره له دې چې هېواد یې د امریکا لپاره ډېر څه کړي،خو هغوی ترې راضي نه دي.
هلته د بندو درازو تر شاه هم د افغانستان په اړه ملکي او پوځي چارواکو سره لیدلي، د پاکستان استخباراتو مشر ویلي، دوی افغان سوله کې خپل رول لوبولی او اجازه نه ورکوي، چې خاوره یې د نورو پر ضد وکارول شي.
بل پلو پر کوردننه یو شمېر د سیاسي چارو تحلیل کوونکي بیا وايي، پاکستان هېڅکله د افغانستان په تړاو رښتینی نه دی او په خبره یې دا تازه څرګندونې طالبانو ته شین څراغ دی،ترڅو خپلې جګړه ییزې تګلارې ته دوام ورکړي.
د سیاسي چارو شنونکی توریالی ځاځی وايي:« پاکستان له پیداېښته تر نننه پورې د افغانستان په اړه دوه مخی سیاست لوبولی دی. زموږ هېواد کې همدا اوس دننه له طالبانو سره پاکستاني جنرالان، پاکستاني پوځیان، د فسادې آی . اس آی ادارې جوسوسان همکاري لري.»
د ساسي چارو شنونکی نازک مېر زیارمل وايي، د نړیوالې ټولنې له لوري پر پاکستان د فشارونو په پایله کې وخت ناوخت ملکي ادارې د پوځ پر ضد کاذب مخالفت ښودلی، خو په خبره یې هېڅکله یې پوځ او استخبارات له خپلو ستراتیژیکو موخو نه دې ګرځولي.
د سیاسي چارو شنونکی نازک میر زیارمل وايي:« تل پاکستان د ملکي حکومت تګلاره ، د پاکستان د پوځي حکومت تګلاره او د استخباراتو ادارې تګلارې سره جلا دي. هر کله چې پاکستان د نړیوالو له خوا تر فشار لاندې نېول شوی، د پاکستان ملکي حکومت یې دا ډول څرګندونې او ژمنې کړي دي، خو هېڅکله هم د پاکستان پوځي اداره او استخباراتي اداره هغو خبرو ته ژمن نه دي پاتې شوي. »
د ارګ مرستیال ویاند محمد امیري بیا وايي، پاکستان عملا له طالبانو خپل ملاتړ ته دوام ور کړی او هغوی ته یې هر ډول اسانتیاوې برابرې کړي دي.
پاکستاني چارواکي ادعا کوي،چې افغان سوله کې یې مثبت رول لوبولی،خو عملا د سولې خبرې پرر ټپه ولاړې دي او جګړه تر بل هر و خت شدیده او پراخه شوې ده، په ټولنیزو رسنینو وخت ناوخت پاکستان ته اوښتونکې جنازې بیا د همدې ادعاو خلاف کېسه ده.
