که څه هم له ايران او پاکستانه په جبر د افغانانو راستنولو دوام په افغانستان کې پر سرچينو فشار زيات کړی، خو په ځانکړې توګه پاکستان کې د افغان کډوالو پر وړاندې د حکومت پرېکړه د ياد حکومت د رقيبانو له مخالفت سره مخ ده.
پخواني لومړي وزير عمران خان چې د تحريک انصاف ګوند مشر او بنسټ اېښودونکی هم دی، د مسلم ليګ ن ګوند په مشرۍ د پاکستان حکومت دا پرېکړه په جدي توګه ننګولې او ويلي يې دي چې په داسې حال کې چې افغانان څو لسيزې په خيبرپښتونخوا او پاکستان کې اوسېدلي، په جبر يې ايستل د بشري او اسلامي اصولو خلاف کار دی.
د پاکستان پخواني لومړي وزیر زیاته کړې: « د افغانانو ایستل د اسلامي اصولو خلاف کار دی. زه د پاکستان د دې کړنې په اړه د شرم احساس کوم.»
بل پلو، په اسلام اباد کې د پاکستاني سیاستوالو او مدنې فعالانو يوې ډلې هم په شريکه د افغانانو جبري اخراج په اړه د پاکستان پرېکړه غندلې او هلته يې له حکومت غوښتي چې د دوی اخراج لپاره له ټاکلي مهلت په شا شي.
د ځينو پاکستاني سیاستوالو او مدني فعالانو په اعلامیه کې راغلي: « له حکومت غواړو چې د سپټمبر له لومړۍ نېټې وروسته د پي او آر او اې سي سي کارت لرونکو افغانانو په ګډون، له ۳ ميلیون زیاتو افغان کډوالو د جبري ستنولو په اړه پر خپل پلان له سره کتنه وکړي. دغه راز د پاکستان له حکومت غواړو چې له افغان کډوالو سره د نړیوالو اصولو په رڼا کې چلن غوره کړي.»
که څه هم د کډوالو او بېرته راستنېدونکو چارو وزارت د کډوالو تازه اندېښنو په تړاو څه نه وايي، خو د سې شنبې په ورځ د دې وزارت مسوولانو ته سپارښتنه شوې چې د کډوالو د راستنېدلو بلې احتمالي څپې ته چمتو والی ونيسي.
له دې سره سم، له پاکستانه په جیري ډول تازه را ایستل شوي ځینې کسان ادعا کوي چې له افغانانو سره د پاکستاني پوليسو ناسم چلن له بدتر شوی.
له پاکستان راستون شوی سراج الدین وايي: « کاروبارونه همداسې پاتې دي، د چا کاډي هغه خواته ولاړ دي، د چا د کور غړي او د چا هم د کور سامان پاتې دی. باید دواړه ملکونه سره کېني او دا خبره وکړي چې کډوال په عزت سره راواړوي. هغه کسان ډېر زلیله کېږي چې دیخوا را روان دي.»
دا اندېښنې داسې مهال دي چې د ملګرو ملتونو د کډوالو عالي کمېشنرۍ هم له اسلام اباده د هغه مهلت د غځولو غوښتنه کړې چې هلته مېشتو افغان کډوالو ته د ايستل کېدو په اړه ورکړل شوی دی.
د پاکستان حکومت په خپله تازه پرېکړه کې ویلي چې د راتلونکې سپټمبر میاشتې له لومړۍ نيټې به يو ځل بيا افغانستان ته په جبر د افغانانو د ستنولو لړۍ پيل شي. د دوی په خبره، د دې لړۍ په پایله کې به ۱.۳ ميليونه افغانان هېواد ته راستانه کړای شي.
