د پاکستان لومړي وزیر عمران خان ویلي، له افغانستانه په بشپړه توګه د بهرنیو ځواکونو تر وتلو وړاندې باید په افغانستان کې سیاسي هوکړه وشي او داسې حکومت جوړ شي، چې طالبانو ته په کې برخه ورکړل شوې وي.
خان له اکسیوس ویب سایټ سره په مرکه کې ویلي، افغانستان کې سیاسي هوکړه د ائتلافي حکومت د جوړیدو مانا لري، چې په خبره یې داسې حکومت، چې طالبان او نورې ډلې په کې شاملې وي.
هغه زیاته کړې، له طالبانو سره له ائتلافي حکومت پرته، افغانستان د کورنۍ جګړې له ګواښ سره مخ کیږي.
د خان په خبره، که طالبان د بشپړ واک په لټه کې شي، دومره وینې به تویې شي، چې باور به یې نه کېږي او په وینا یې له افغانستان وروسته که بل کوم هېواد ډیر زیان ګوري، هغه به پاکستان وي.
په ورته وخت کې خان وايي، پاکستان چمتو ده، چې په افغان سوله کې له امریکا سره د یوه شریک په توګه کار وکړي.
د عمران خان له دې څرګندونو وړاندې د بهرنیو چارو وزیر شاه محمود قریشي هم ویلي ول، که د افغانستان ستونزه د خبرو اترو له لارې حل نه شي، د کورنۍ جګړې ګواښ به ډېر شي.
