د بهرنیو چارو وزارت د سرپرست وزیر امیرخان متقي پر مشرۍ ترکمنستان ته د تللي پلاوي دوه ورځينی سفر د دواړو هېوادونو لپاره ګټور او له لاسته راوړنو ډک بلل شوی دی.
دواړو خواوو پرېکړه کړې چې د ګډو او متقابلو همکاريو پر اساس به دوه اړخيزه ډيپلوماټيکي اړيکې پياوړې کوي.
متقي وايي، دواړه هېوادونه د ښو اړیکوغوښتونکي دي او په خبره یې، کابل او عشقاباد غواړي په ټولو برخو کې ګډه همکاري زیاته کړي.
متقي زیاتوي: « دواړه هېوادونه غواړي د سیمې پر کچه ښه رول ولري، موږ غواړو د لاجورد لاره چې له ترکمنستانه تېرېږي له دې هم ګټه واخېستل شي او ترکمنستان په دې برخه کې ډېره لېوالتیا ښودلې، چې افغانستان به له دې لارې له اروپا سره وصل شي. همداراز په کوردننه دا داسې پروژه ده چې ترکمنستان په کې پانګونه کوي او د افغانستان لپاره ښه چمتوالی لري او په ټولو برخو کې ښې هوکړې شوې دي.»
د متقي پر مشرۍ ترکمنستان ته تللي پلاوي په ترکيب کې د افغانستان د برېښنا شرکت پر استازي سربېره د کانونو او پټرولیم وزارت او ځينو نورو ادارو استازي شامل دي.
متقي وايي، د ترکمنستان له چارواکو سره يې د ټاپي پر پروژې سربېره په تولیدي برېښنا، اوسپنې پټلۍ او ورته نورو مهمو مسایلو خبرې او د ګډې همکارۍ ژمنې کړي دي.
متقي ډاډ ښودلی، چې راتلونکی کال به له پلان سره سم د سترو پروژو د تطبیق لپاره عملي اقدامات وشي.
هغه زیاتوي: « ترکمنستان د بهرنیو چارو ښ وزیر سره مو اوږد ملاقات درلوده، نن ټوله ورځ مو د بېلابېلو موضوعګانو په اړه خبرې اترې کړي، چې مهمې یې د ټاپي پروژه، د برېښنا زیاتوالی، د اوسپنې پټلۍ او نورې برخې وې چې د دې ټولو په اړه مو ښې خبرې اترې وشوې، همدراز د سوداګرۍ موضوع هم ډېره اړینه وه چې بحث پرې وشو او پرېکړه وشوه چې ټولو برخو کې به ښیې لاسته راوړنې ولرو.»
د سیاسي چارو کارپوهان وایې، چې په افغانستان کې هر ډول پروژو ته زمینه برابره شوې ده.
دوی ټينګار کوي، چې اوس مهال په هېواد کې د لاجوردو لارې او ورته نورو پروژو تطبيق لپاره هر اړخیز امکانات شته، چې باید ښه ګټه ترې واخېستل شي.
د سیاسي چارو کارپوه ادریس محمدي ځاځی وايي: « افغانستان کې دمګړۍ د هرې پروژې د پلي کولو، پيلولو او خاتمې لپاره هر ډول زمینې برابرې شوې دي، هغه که د لاجوردو لاره ده، که ورېښمینه لاره ده او که د یک هزار پروژو په څېر نورې پروژې دي، د دې ټولو لپاره اوس په افغانستان کې هر اړخیزه امکانات برابر دي. د لاجوردو لاره چې منځنۍ اسیا، جنوبي اسیا او اروپا سره نښلوي، تر ټولو مهمې پروژې دي، چې اوس ورته په افغانستان کې هر اړخیزه امکانات برابر شوې دي.»
د سیاسي چارو کارپوه عزیز معارج وايي: « هره ټرانزیټي لار چې له افغانستانه نورو هېوادونو او په ځانګړې توګه اروپايي هېوادونو ته ځي او افغانستان ورسره نښلوي، دا د افغانستان د اقتصاد او پرمختګ لپاره ډېره ګټه لري، لکه د لاجورد لار یا لکه ورېښمو لار یا نورې لارې؛ نو هرومرو دا ډېرې ګټورې تمامېږي چې د دې لارو په اړه تصمیمونه ونیول شي، له هېوادونو سره هوکړه وشي او په دې عملا کار پیل شي، دا نو ډېره غوره ده.»
متقي عشقاباد ته ډاډ ورکړی، چې په افغانستان کې د پانګونې او سوداګرۍ لپاره تر بل هر وخت ښه زمینه برابره شوې او له متقابل لوري يې هم ډاډ ترلاسه کړی، چې د پانګهونې په برخه کې به لازمې اسانتیاوې ورته برابرې کړي.
متقي زیاته کړې: « دواړه هېوادونه له یو بله ښه ډاډمن دي، هېڅ ډول اندېښنې نه لري او له یو بل سره همکار دي، د ډاډ کچه ډېره لوړه شوې او هر هېواد غواړي د سیمې پر کچه ښه رول ولري.»
چارواکي وايي، دواړه هېوادونو ډاډ ښودلی چې د يوه او بل په اړه اندېښنه نهلري او ترمنځ يې د باور فضا د بل هر وخت پرتله ډېره شوې ده.
