په متحده عربي اماراتو کې د افغان سوداګرو شورا استازي وايي، د دغو جوماتونو جوړولو چارې چې د کونړ ولایت نورګل ولسوالۍ زلزله ځپلې مزار درې په بېلابېلو کلیو کې جوړیږي، تر راتلونکو درېیو میاشتو پورې به بشپړې شي.
د افغان سوداګرو شورا یو استازی مولوي احمد شاه حجازي وايي، په متحده عربي امارتو کې د افغان سوداګرو دې شورا د طبعیي پېښو پر مهال که هغه زلزلې وي یا سېلابونه، تل یې له زیانمنو سره مرستې کړې دي.
د هغه په خبره، دا پنځه محرابه جوماتونه به په پاخه او اساسي ډول جوړ او ګټه اخستنې ته وسپارل شي.
مولوي احمد شاه حجازي وايي: « عربي متحده اماراتو کې د افغان سوداګرو شورا تل په افغانستان کې د پېښو پرمهال مرستې کړې. دا دی نن یې دلته د پنځو جوماتونو جوړولو کارونه هم پیل کړل.»
په متحده عربي اماراتو کې د افغان سوداګرو شورا استازی حاجي شهزاده وايي: « موږ د پېښو پرمهال له خپلو خلکو سره ولاړ یو او خدمت یې کوو.»
بله خوا، د مزار درې د بېلابېلو سیمو اوسېدونکي د یادو جوماتونو په جوړولو خوښي څرګندوي او وايي، دا یوازینی کمښت و چې په متحده عربي اماراتو کې د افغان سوداګرو د شورا له خوا پوره کېږي.
خو ځینو اوسېدونکو بیا د دې شورا له خوا د لا زیاتو مرستو غوښتنه وکړه، ترڅو په سیمه کې د زلزله ځپلو خلکو سم لاسنیوی وشي.
د سیمې یو تن اوسېدونکی وايي: « موږ د متحده عربي اماراتو له افغان سوداګرو ډېره مننه کوو چې موږ ته دا جوماتونه جوړوي. دا زموږ یوازینی کمبود و چې د دوی له خوا پوره شو.»
یوبل اوسېدونکی وايي: « موږ له دې خلکو د نورو مرستو او همکاریو تمه هم لرو.»
د کونړ ولایت د نورګل ولسوالۍ مزار دره تقریبا یو کال مخکې یوې سختې زلزلې وځپله چې د سیمې خلکو ته یې د سر او مال درانه زیانونه واړول.
