د ایران بهرنیو چارو وزیر، سید عباس عراقچي، د رضوي خراسان ولایت د ګرځندوی او لاسي صنایعو د پانګوالو په یوې غونډه کې ویلي، افغان وګړو ته د وېزو ورکړې په برخه کې هېڅ ډول خنډونه نه دي ایجاد شوي.
ایراني رسنیو د نوموړي له قوله ویلي، هڅه کېږي د روغتیا او سیلانیانو لپاره د وېزو د ورکړې برخه کې اسانتیاوې رامنځته او په دې برخو کې مشخص سیسټمونه او روښانه کړنلارې جوړې شي، ترڅو متقاضیان وکولی شي په اسانه توګه ایران ته قانوني سفر وکړي.
عراقچي ویلي: « له ګاونډیو سره په سرحدي سیمو کې ډېری پېښېدونکې ستونزې له ځنډ پرته په ولایتي کچه حلېدای شي. دا اړینه نه ده چې له ګاونډیو سره د بحث هره راپورته شوې مسئله د هېوادونو مرکزي حکومتونو ته راجع شي.»
نوموړي همداراز د رضوي خراسان ولایت له چارواکو غوښتي چې له افغانستان، پاکستان او ترکمنستان سره د سوداګرۍ، تګ راتګ او اقتصادي همکاریو د پراختیا لپاره خپل موجوده صلاحیتونه وکاروي.
د چارو شنونکي وايي، زموږ هر گاونډی چې افغاني محصولاتو او افغان سوداګرو لپاره د تګ راتګ فرصتونه ایجادوي، د وېزو او نور خدماتو په برخه کې سهولتونه رامنځته کوي، پرته له شکه د افغانستان پر اقتصاد مثبت اغېز لري. دوی ټینګار کوي چې دا ډول اړیکې دې د دواړو هېوادونو ترمنځ تلپاتې دوام وکړي.
د اقتصادي چارو شنونکی نورالله عزیز وايي: « دوی کولی شي د نورو کارګرانو د استخدام، پانګونې او د پانګې د جذب په برخه کې لازم امکانات او فرصتونه رامنځته کړي. باید ووایم، هر هغه سهولت چې کولی شي د افغانستان تجارت او خلکو لپاره فرصتونه برابر کړي، د افغانستان پر تجارت او تجارتي اړیکو فوق العاده تأثیر لري او کېدای شي اقتصادي وضعیت ورسره تغییر وکړي.»
له ایران سره د افغانستان اوسنۍ سوداګري او اقتصادي اړیکې پراخه شوې مګر په سیاسي سټېج کې لا هم ایران هغه ګام نه دی اخستی چې کابل یې له تهران څخه تمه لري.
د سیاسي چارو یو شمیر شنونکي د ایراني چارواکو په دې ډول څرکندونو بې باوره دي او ټینګار کوي چې که دا هېواد خپلو خبرو کې ریښتینی وي، نو افغان حکومت باید په رسیمت وپېژني او په دې هېواد کې له مېشتو کډوالو سره خپل چلن بدل کړي.
د سیاسي چارو شنونکی توریالی ځاځی وايي: « پر دغو هېوادونو باور کول یوه تېروتنه ده، ځکه چې دوی افغانستان لا په رسمیت نه دی پېژندلی او زموږ له مهاجرینو سره ډېر ناړه چلن کوي. د دغو هېوادونو په خبرو هغه وخت اعتماد په کار دی چې افغانستان په رسمیت وپېژني او ډېپلوماټیکې اړیکې جوړې کړي.»
د ایران بهرنیو چارو وزیر سید عباس عراقچي دا هم ویلي چې د خراسان رضوي ولایت استازولي به یې له ګاونډیو هېوادونو سره د اړیکو رغولو کې مرسته وکړي، ترڅو بهرني سیاسي ظرفیتونه د اقتصادي ودې، سوداګرۍ، سیلانیانو او لاسي صنایعو د بازار پراختیا لپاره وکارول شي.
