د ریاست الوزرا سیاسي مرستیال مولوي عبدالکبیر په سپېدار ماڼۍ کې د ننګرهار د نازیانو ولسوالۍ له یو شمېر قومي مشرانو او مخورو سره په لیدنه کې د داعش ډله په بشپړ ډول ځپل شوې بللې.
مولوي عبدالکبیر ویلي، تېر کې داعش ډلې د تحرکاتو په پایله کې د ننګرهار په ګډوڼ د هېواد د نورو ولایتونو اوسېدونکي له ګڼو ستونزو سره مخ کړي وو؛ خو په خبره یې اوس دغه ډله له منځه وړل شوې.
هغه زیاته کړې:« شینواري ولسونه د ننګرهار د نورو اوسېدونکو په څېر په تېر کې د داعش فتنه ګرې ډلې قربانیان وو، خو له نېکه مرغه چې د اسلامي امارت ځواکونو له لوري دغه ډله له منځه تللې او د ننګرهار ولسونه یې له شره ژغورل شوي دي.»
د سیاسي چارو شنونکي داعش بهرنۍ پدیده بولي چې په وینا یې په افغانستان کې هېڅ راز د پېښې او فعالیت ځای نه شي خپلولی.
دوی دغه ډله په سیمه کې د نړیوالو لویو استخباراتي کړیو د پلانونو د عملي کولو لپاره جوړه شوې پدیده ګڼي، چې په وینا یې اصلي موخه یې د هېوادونو ناارامه کول او ترهګري خپرول دي.
د سیاسي چارو شنونکی اختر محمد راسخ وايي:« داعش په افغانستان یا د افغانانو ترمنځ د ودې او تکامل لاره نه شي خپلولی، د داعش عنوان او داعش پدیده د عربي هېوادونو د ځپلو، بدبختیو، جنګونو او ناخوالو لپاره جوړه شوې وه، چې دغه پدیده خپله د سي .آی اې د رهبرۍ تر چتر لاندې د انګلستان له پلان سره سمه جوړه شوې وه.»
بل پلو بیا یو شمېر نور تېر کې د داعش پراخو تحرکاتو ته په کتو وایي، چې د دې پدیدې له منځه وړل پراخو او دوامداره هڅو ته اړتیا لري.
د سیاسي چارو شنونکی برنا صالحي وايي: « دا سمه ده چې په افغانستان کې د داعش تحرکات او فعالیتونه د تېر پرتله کم شوي؛ خو دا په دې مانا نه ده چې داعش یا نورې ترهګریزې ډلې په بشپړه توګه له منځه تللي. افغانستان داسې هېواد دی چې دلته تل د ترهګریزو ډلو موجودیت شونی دی؛ خو په دې کې هم شک نشته چې نن داعش او نورې هغه ترهګریزې ډلې چې د نظام پر وړاندې یې کړنې ترسره کولې؛ تر ډېره ځپل شوې دي.»
د ریاست الوزا سیاسي مرستیال په هېواد کې داسې مهال د داعش ډلې له منځه وړلو خبره کوي، چې له دې وړاندې هم ملګرو ملتونو او ګڼو نړیوالو هېوادونو د يادې ډلې پر وړاندې د سرپرست حکومت مبارزه ستایلې او ترسره شوي اقدامات يې اغېزناک بللي.
