د ریاست الوزرا سیاسي مرستیال مولوي عبدالکبیر په جلا جلا ناستو کې ایران او متحده عرب اماراتو کې د افغانستان له سفیرانو سره په کتنه کې ټینګار کړی چې له نړۍ سره په متقابل درناوي ولاړې ښې اړیکې غواړي.
نوموړي په دغو لیدنو کې له ټولو افغان سفیرانو غوښتي، چې کوروبه هېوادونو او پانګوالو ته یې د سیاسي تعامل او په افغانستان کې د پانګونو د شته فرصتونو په تړاو واضح مالومات ورکړي.
عبدالکبیر زیاته کړې: « اسلامي امارت له ټولو هېوادونو سره د متقابل احترام په فضاء کې ښې اړیکې غواړي او افغان استازي باید هڅه وکړي، چې په افغانستان کې د پانګونې، سوداګرۍ او ټرانزیټ په اړه له شته فرصته او د تعامل سیاسي اراده کوربه هېوادونو او پانګوالو ته ښه توضیح کړي.»
د سیاسي چارو کارپوه هاتف مختار وايي: « دا چې د افغانستان د ریاستالورزا سیاسي مرستیال د افغانستان سفیر غوښتی او هلته یې ورته د افغانستان ستراتیژي او پالېسي مطرح کړې دا د افغانستان لپاره ګټوره ده او له بله اړخه د افغانستان سفیران مسوولیت لري چې د افغان ملت انځور په نړیواله کچه مطرحه کړي.»
د سیاسي چارو کارپوهان په دې باور دي چې د سفارتونو له لارې د هېوادونو د ملاتړ لاسته راوړلو او له افغانستان سره یې د تعامل لپاره دغه هڅې پرځای اقدام دی خو د نړیوالو چارو او د هېوادونو ترمنځ د اړیکو د پراختیا له پلوه اړینه ده چې د نړیوالې ټولنې غوښتنې او د افغان ولس اراده په پام کې ونیول شي.
دوی وايې، دغې موخې ته چې له نړۍ سره سیاسي تعامل دی د رسېدو لپاره داخلي او بهرني سیاست کې یو لړ بدلونونو ته اړتیا ده چې باید راوستل شي.
د سیاسي چارو کارپوه نجیب الرحمان شمال وايي: « په بهرنیو هېوادونو کې د افغانستان د سفارتونو له لارې د هېوادونو د ملاتړ او له افغانستان سره یې د تعامل لپاره د اوسني سرپرست حکومت د چارواکو او مسوولینو غوښتني نېک اقدام دی؛ خو د هېوادونو ترمنځ د نړیوالو چارو او سیاسي او ډیپلوماټيکو اړیکو د پراختیا له پلوه دا هر څه بسنه نه کوي او اړینه ده چې اوسنی سرپرست حکومت د خپلو اړیکو د پراختیا او په نړیواله کچه د رسمیت پېژندلو لپاره لومړی د نړیوالې ټولنې غوښتنو او د افغان ولس ارادې ته ډېره پاملرنه وکړي او د نړیوال سیاست او حکومت جوړونې برخه کې د بدلونونو په راوستو سره سیاسي او ډیپلوماټیکو اړیکو د پراختیا زمینه برابره کړي.»
د سیاسي چارو کارپوه شهزاده مسعود بیا وايي، له نړۍ سره د تعامل لپاره پکار ده چې یو لړ کورنۍ دندې چې اړتیا ورته لیدل کېږي باید ترسره شي او پرمټ یې د بهرنیانو ټولې پلمې چې د افغانستان د رسمیت پېژندنې پر وړاندې خنډ په توګه مطرح کړي دي ورختمې شي.
مسعود زیاتوي: « نړۍ د یوه کور حېثیت لري او افغانستان د دې کور یوه برخه ده؛ نو یو لړ مسایل د کور دننه دي چې باید رسېدنه ورته وشي، له دې سره به د بهرنیانو پلمې هم ختمې شي او دا طبعي خبره ده چې باید له نړیوالو سره د یوه مثبت تعامل له لارې اړیکې جوړې شي.»
د ریاست الوزرا سیاسي مرستیال مولوي عبدالکبیر له سفیرانو سره په دغو جلاجلا لېدنو کې له افغان سیاسي استازو دا هم غوښتي چې په کوربه هېوادونو کې د مېشتو افغانانو ستونزو حل ته په خپلو چارو کې لومړیتوب ورکړي.
