د ریاست الوزرا سیاسي مرستیال مولوي عبدالکبیر له لوري په کابل کې مېشتو بهرنیو ډیپلوماټو ته روژه ماتی برابر شوی و، چې په کې د هېوادونو سفیرانو، د ملګرو ملتونو، اروپايي ټولنې او اسلامي کنفرانس استازو ګډون درلود.
د غونډې ګډونوالو ته د رئیس الوزرا سیاسي مرستیال مولوي عبدالکبیر په خپلو خبرو کې وویل، تمه لري چې تر راتلونکې روژې په کابل کې د بهرنیو ډیپلوماټانو شمېر له دې هم زیات وي.
نوموړي زیاته کړه، چې په سیمه او نړۍ کې ځېنې کړۍ په افغانستان کې د داعش لپاره تبلغات کوي؛ په داسې حال کې چې داعش نه یوازې د افغانستان بلکې د ټولې نړۍ او بشریت دوښمن دی.
عبدالکبیر وايي، داعش ډله یې په افغانستان کې ځپلې او هېڅوک باید د دغې ډلې د ځواکمن ښودلو لابي ونه کړي.
هغه زیاتوي: « په سیمه او نړۍ کې ځېنو کړیو په افغانستان کې د داعش لپاره په تبلیغاتو لاس پورې کړی دی. داعش نه یوازې د افغانستان، بلکې د بشریت، سیمې او نړۍ دوښمن دی، اسلامي امارت دغه ډله په افغانستان کې ځپلې ده او هېڅوک یې باید د قوي ښودلو او پياوړتیا لپاره لابي ونه کړي.»
د سیاسي چارو شنونکی سلیم پیګیر وايي: « په عمومي ډول ترهګرې ډلې نړیوال یا د یوه لوی هېواد ملاتړ لري او همدوی دي چې یادې ډلې حمایه کوي او مالي ملاتړ یې کوي، لا یې پسې پراخوي او بیا یې د خپلو موخو لپاره د نورو هېوادونو پر وړاندې کاروي؛ نو د داعش ډله هم له دې مسالې مستثنا نه ده.»
دغه کابل مېشتي بهرني ډیپلوماټان چې سپیدار ماڼۍ ته د روژماتي په پلمه وربلل شوي وو؛ د اسلامي امارت د سیاسي مرستیال له لوري ورته د افغانستان د نظام بهرنۍ تګلاره وړاندې شوه.
مولوي عبدالکبیر وویل، افغانستان د خپل بهرني سیاست له مخې غواړي چې له ټولو هېوادونو سره ښې اړیکې ولري، له نړۍ سره د سیاسي، اقتصادي او کلتوري اړیکو ټینګښت غواړي او هیله لري چې په سیمهییزو پروژو کې د ونډې اخېستلو پر مټ د وصل د نقطې په توګه عمل وکړي.
عبدالکبیر زیاته کړې:« اسلامي امارت د خپل اقتصاد محوره بهرني سیاست له مخې غواړي له ټولو هېوادونو سره ښې اړیکي ولري او د سیمې هېوادونه کولی شي په ګډه سیمهییز نوښتونه رامنځته او پياوړي کړي. اسلامي امارت لېواله دی چې له نړیوالو سره سیاسي، اقتصادي او فرهنګي اړيکې ولري، په سیمه ییزو پروژو کې ونډه واخلي او د وصل د نقطې په توګه عمل وکړي.»
نوموړي یوځل بیا وویل، د افغانستان ګاونډیان دې ډاډه وي چې د افغانستان له خاورې به هېڅ ډول ګواښ ورته پیښ نه شي.
د دغه لوړ پوړي چارواکي په وینا، هغوی چې په افغانستان کې ماتې خوړلې د افغانستان او سیمې اړیکې او تعامل او په کوردننه د پرمختګونو رامنځته کېدل ورته د منلو نه دي.
