د ریاست الوزرا سیاسي مرستیال مولوي عبدالکبیر د اسیا او ارام سمندر لپاره د ملګرو ملتونو کډوالو چارو کمېشنرۍ او یونیسیار له مشرې های کیونګ جون سره د لیدنې پر مهال ویلي، افغان کډوال د پاکستان په ناامنۍ کې هېڅ لاس نه لري؛ خو بیا یې هم دغه هېواد پر وړاندې چلن نه دی بدل کړی.
اسلامي امارت وايي، افغان کډوال د پاکستان او نورو هغو هېوادونو په ناامنه کولو کې لاس نه لري، چې دوی په کې مېشت دي.
د اسلامي امارت ویاند ذبیح الله مجاهد وايي، افغانان چې په کومو هېوادونو کې کډوال دي د هماغه کوربه هېوادونو د قوانینو ترسیوري لاندې ژوند کوي او په سیاسي مسایلو کې بې طرف پاتې شوي دي.
د مجاهد په خبره، د پاکستان په ګډون ټولو هغو هېوادونو ته په کار دي، چې د افغان کډوالو مسالې ته د بشري موضوع په سترګه وګوري.
مجاهد زیاته کړې: « کډوال د هېڅ هېواد په نامنۍ کې ونډه نه لري. دا ۴۰ کاله کېږي افغانان په بېلابېلو هېوادونو کې کډوال دي؛ خو د هغوی په ناامنیو، سیاسي او داخلي موضوعګانو کې هېڅ چا لاسوهنه نه ده کړې او نه یې د هغوی له قوانینو سرغړونه کړې؛ په دې تړاو باید بد ګماني رامنځته نه شي او د کډوالو قضیه باید یوه انساني او بشري قضیه وبلل شي او خواخوږي ورسره وشي.»
د سیاسي چارو کارپوهان وايي، دا چې پاکستان د خپل هېواد ناامني له افغان کډوالو انګېري دا یې ناسمه محاسبه ده .
دوی وايي، ترهغې چې پاکستان په خپلو سیاستونو کې ژور بدلون رانه ولي او د ترهګرۍ له ملاتړه لاس وانخلي ټیکاو او تل پاتې ثبات ته به ونه رسېږي.
د سیاسي چارو شنونکی نجیب الله جامع وايي: « افغانان نه یوازې د پاکستان بلکې د هېڅ هېواد په ناامنیو او هلته د شر په جوړولو کې لاس نه لري. کوم شر چې پاکستان ته نن جوړ دی دا د پاکستان د څوسره وجود او ماهیت له امله دی؛ نو تر هغې چې پاکستان په خپلو سیاستونو کې بدلون را نه وړي او خپل په کرايي جګړو ولاړ سیاستونه تعریف او بدل نه کړي، دا ناشونې ده چې پاکستان دې په سیمه کې ثبات ته ورسېږي.»
د سیاسي چارو شنونکی یوسف امین ځاځی وايي: « دا پر افغانانو یو تور دی. افغانان نه ترهکر دي، نه ترهګر کېدای شي او نه د چا په ناامنیو کې لاس لري، د یوه افغان او مسلمان په صفت زه دا ردوو.»
په ورته مهال اسلامي امارت د پاکستان ترڅنګ په ایران او ترکیه کې هم د افغان کډوالو پر وضیعت اندېښنه ښودلې.
ذبیح الله مجاهد شمشاد ته وویل، په دغو هېوادونو کې له افغان کډوالو سره زور زیاتی کېږي په زور او نامناسبو شرایطو کې وېستل کېږي.
مجاهد وايي، ملګرو ملتونو ته په کار ده چې له افغان کډوالو سره د دغه ډول چلن پر وړاندې اقدام وکړي.
هغه زیاتوي: « د کډوالو موضوع یوه مهمه موضوع ده، یوازې په پاکستان کې نه بلکې په ایران او ترکیه کې له کډوالو سره زور زیاتي کېږي او په زور را وېستل کېږي؛ نو په دې اړه باید ملګري ملتونه خپل اعتراض ولري او له هېوادونو سره خبرې وکړي.»
په تېرو څو میاشتو کې پاکستان په سلګونه زره افغان کډوال په زور او ساړه ژمي کې وېستلي دي، چې نړیوالو بشري ادارو یې دغه کار د کډوالۍ د قوانینو خلاف یاد کړی دی.
